ދުނިޔޭގެ މަސްރަހު ދުވަހެއް ދުވަހަކަށް ނުތަނަވަސްވަމުންދާ ދަނޑިވަޅެއްގައި، ފްރާންސުން އެ ގައުމުގެ ނިއުކްލިއާ ހަތިޔާރުގެ ގާބިލުކަން އިތުރުކޮށް، ޔޫރަޕްގެ އެހެން ގައުމުތަކާ ގުޅިގެން ދިފާއީ އާ ރޭވުންތަކެއް އިއުލާންކޮށްފިއެވެ.
ފްރާންސްގެ ރައީސް އިމަނުއެލް މެކްރޮން، ބްރެސްޓް ބަނދަރުގައި އޮންނަ އައިލް ލޮންގް ނޭވަލް ބޭސްގައި ސިފައިންނާ މުހާތަބު ކުރައްވަމުން ވިދާޅުވީ، ކުރިއަށް އޮތް 50 އަހަރަކީ ނިއުކްލިއާ ހަތިޔާރުގެ ޒަމާން ކަމަށެވެ. އެހެންކަމުން ޒަމާނާ އެއްގޮތަށް ތައްޔާރުވުމުގެ ގޮތުން، ފްރާންސްގެ ނިއުކްލިއާ ވޯހެޑްތަކުގެ އަދަދު މިހާރު ހުރި މިންވަރަށްވުރެ އިތުރުކޮށް، 300 އަށްވުރެ މައްޗަށް ޖައްސާނެކަމަށް އޭނާ ވިދާޅުވިއެވެ. މިއީ އެ ގައުމުގެ ނިއުކްލިއާ ޑިފެންސް ޕޮލިސީއަށް ގެނައި ވަރަށް ބޮޑު ބަދަލެކެވެ.
މީގެ އިތުރުން، ފްރާންސްގެ އަސްކަރީ ގާބިލުކަން ފުޅާކުރުމުގެ ގޮތުން 2036 ވަނަ އަހަރު "ދަ އިންވިންސިބަލް" ގެ ނަން ދީފައިވާ ނިއުކްލިއާ ހަތިޔާރު އުފުލާ އާ ސަބްމެރިންއެއް ބޭނުންކުރަން ފަށާނެކަންވެސް ރައީސް ވަނީ ހާމަކުރައްވާފައެވެ. މި ބަދަލުތަކާއެކު ފްރާންސުން ވަނީ ޔޫރަޕްގެ އިތުރު އަށް ގައުމަކާއެކު "އެޑްވާންސްޑް ޑިޓަރެންސް" ސްޓްރެޓެޖީއެއްގައި ބައިވެރިވުމަށް އެއްބަސްވެފައެވެ. މި އިއްތިހާދުގައި ހިމެނެނީ އިނގިރޭސިވިލާތް، ޖަރުމަނު، ޕޮލެންޑް، ނެދަލެންޑްސް، ބެލްޖިއަމް، ގްރީސް، ސްވިޑެން އަދި ޑެންމާކެވެ.
މެކްރޮން ވިދާޅުވި ގޮތުގައި މި ގައުމުތަކަށް ފްރާންސްގެ ވައިގެ ނިއުކްލިއާ ތަމްރީނުތަކުގައި ބައިވެރިވުމުގެ ފުރުސަތު ލިބިގެންދާނެއެވެ. އަދި ފްރާންސްގެ ނިއުކްލިއާ ބޮން އަޅާ ބޯޓުތައް ބަހައްޓާނެ މަރުކަޒުތައް ހޯސްޓްކުރުމުގެ ފުރުސަތުވެސް މި ގައުމުތަކަށް އޮންނާނެއެވެ. އޭނާ ސިފަކުރެއްވި ގޮތުގައި މިކަމުގެ ސަބަބުން ފްރާންސްގެ ސްޓްރެޓެޖިކް އެއާ ފޯސަސް ޔޫރަޕް ބައްރުގައި ފުޅާވެ، ދުޝްމަނުންނަށް ވަރުގަދަ ގޮންޖެހުމަކަށް ވެގެންދާނެއެވެ.
މި ނިންމުމަށް ތާއީދުކުރައްވައި ޕޮލެންޑްގެ ބޮޑުވަޒީރު ޑޮނަލްޑް ޓަސްކް އެކްސްގައި ލިޔުއްވާފައިވަނީ، އެކުވެރިންނާ ގުޅިގެން ހަތިޔާރު ބިނާކުރުމަކީ ދުޝްމަނުން ހަމަލާދިނުމަށް ފަސްޖެހޭނެ އަދި ނުކެރޭނެވަރުގެ ކަމެއް ކަމަށެވެ.
ކޮމެންޓު ފޮނުވާ