ފޯޅަވަހި ނުވަތަ ޗާގޯސް އައިލެންޑްސްއަކީ ދިވެހިންނާ ތާރީޚީ ގޮތުން ގުޅިފައިވާ ތަނެއް ކަމަށާއި، އިނގިރޭސިވިލާތުގެ އަތްދަށުން އެތަން ދޫކޮށްލާނަމަ، އެތަން ލިބުން އެންމެ ޙައްޤުކަން ބޮޑު ޤައުމަކީ ދިވެހިރާއްޖެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ފޯޅަވައްސަކީ ދިވެހިންގެ ތަނެއްކަން ސާބިތުކޮށްދޭ ތާރީޚީ ވަރުގަދަ ހެކިތައް އެބަހުރި ކަމަށެވެ. މީގެ އެއް ހެއްކެއްގެ ގޮތުން، 16 ވަނަ ޤަރުނުގައި ނުވަ ވަނަ ޙަސަން ރަސްގެފާނު ލިޔުއްވާފައިވާ ސިޓީފުޅެއް، ފޯޅަވަހީގެ ޗާޓަކާއެކު ފެންނަން އޮތްކަން އެމަނިކުފާނު ފާހަގަކުރެއްވިއެވެ. އެހެންކަމުން، މިހާރު އިނގިރޭސީންގެ ބެލުމުގެ ދަށުގައި އޮތް އޮތުން ނިމުމަކަށް ގެނެސް، އެހެން ޤައުމަކާ އެތަން ހަވާލުކުރާނަމަ، އެކަމުގެ މިލްކުވެރިކަން އެންމެ ބޮޑަށް ހައްގުވަނީ ދިވެހިރާއްޖެއަށް ކަމުގައި ރައީސް ވިދާޅުވިއެވެ.
މި ތާރީޚީ ޙައްޤު ހޯދުމަށްޓަކައި ދިވެހި ސަރުކާރުން އިނގިރޭސިވިލާތާއެކު މަޝްވަރާތައް ފަށާފައިވާކަންވެސް ރައީސް ވަނީ ހާމަކުރައްވާފައެވެ. މިގޮތުން އިނގިރޭސި ބޮޑުވަޒީރަށް ދެ ސިޓީފުޅެއް ފޮނުއްވައި، ފޯނުން ގުޅުއްވައި މަޝްވަރާ ކުރައްވާފައިވާކަމަށް އެމަނިކުފާނު ވިދާޅުވިއެވެ. އަދި މިކަމަށް ބޭނުންވާ ލިޔެކިޔުންތައް ނުވަތަ ޑޮކިއުމެންޓޭޝަން ތައްޔާރުކޮށް، ކަމާބެހޭ ބައިނަލްއަޤްވާމީ ފަރާތްތަކަށް ހުށަހެޅުއްވުމުގެ މަސައްކަތް ކުރައްވާނެކަމުގެ ޔަޤީންކަން ރައީސް ދެއްވިއެވެ.
މީގެއިތުރުން، ފޯޅަވަހީގެ މައްސަލައިގައި ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުން ގެންގުޅުއްވި ސިޔާސަތު ބަދަލުކުރައްވާފައިވާކަންވެސް ރައީސް ފާހަގަކުރެއްވިއެވެ. އެގޮތުން، އިންޓަރނޭޝަނަލް ކޯޓް އޮފް ޖަސްޓިސްގެ ލަފަޔަކާ ގުޅިގެން ރާއްޖޭގެ ސްޓޭންޑް ބަދަލުކޮށް، 2022 ވަނަ އަހަރު މޮރިޝަސްގެ ބޮޑުވަޒީރަށް ރައީސް ޞާލިޙް ފޮނުއްވި ސިޓީފުޅު އަނބުރާ ގެނައުމަށް ނިންމަވައި، އެކަން މޮރިޝަސްގެ ސަރުކާރަށް ރަސްމީކޮށް އަންގަވާފައިވާކަމަށް ރައީސް ވިދާޅުވިއެވެ.
ކޮމެންޓު ފޮނުވާ