މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ދަށުން ހިންގަމުން އަންނަ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) ގެ އިސްވެރިޔާގެ މަޤާމުގައި ހުންނެވި އިސްމާއިލް ސާޖިދުގެ މައްޗަށް ތުހުމަތުކުރެވުނު ޖިންސީ ފުރައްސާރައިގެ މައްސަލައެއް ސާބިތުވުމާ ގުޅިގެން، އޭނާ އެ މަޤާމުން ވަކިކޮށްފިއެވެ.
ސާޖިދު މަޤާމުން ވަކިކުރުމަށް ނިންމާފައިވަނީ، އޭނާއާ ދެކޮޅަށް ހުށަހެޅުނު ޝަކުވާތައް އެމްއެމްއޭގެ ޖިންސީ ފުރައްސާރަ ހުއްޓުވުމާ ބެހޭ ކޮމިޓީން ތަހުގީގުކުރުމަށްފަހުގައެވެ. އެ ކޮމިޓީގެ ތަހުގީގަށް ސާޖިދުގެ މައްޗަށް ކުރެވުނު ތުހުމަތުތައް ސާބިތުވާކަމަށް ނިންމައި، އޭނާ ވަޒީފާއިން ވަކިކުރުމަށް ލަފާދީފައިވާތީ، އެ ނިންމުމާ އެއްގޮތަށް މިއަދުން ފެށިގެން އޭނާ ވަނީ މަޤާމުން ދުރުކޮށްފައެވެ.
މިދިޔަ އަހަރުގެ އޮގަސްޓް މަހު އެފްއައިޔޫގެ ހިންގުމާ ހަވާލުވެވަޑައިގެންނެވި ސާޖިދު، މި މައްސަލަ ފެންމަތިވުމާ ގުޅިގެން ހުންނެވީ މިދިޔަ ޑިސެމްބަރު މަހުގެ 30 ވަނަ ދުވަހުން ފެށިގެން ސަސްޕެންޝަނުގައެވެ. ސާޖިދަކީ މީގެ ކުރިން ޓެކްސް އެޕީލް ޓްރައިބިއުނަލުގެ މެންބަރުކަންވެސް ކުރައްވާފައިވާ ބޭފުޅެކެވެ.
އެފްއައިޔޫއަކީ މަނީ ލޯންޑްރިންގ އާއި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ ދަށުން ރާއްޖޭގެ މާލީ މުއާމަލާތްތައް މޮނިޓަރކޮށް ބެލެހެއްޓުމަށް އެމްއެމްއޭގައި ޤާއިމުކޮށްފައިވާ މުހިންމު އިދާރާއެކެވެ. ޤާނޫނު ބުނާގޮތުން އެ ޔުނިޓުގެ އެންމެ އިސްވެރިޔާ އައްޔަންކުރުމާއި ވަކިކުރުމުގެ පުރިހަމަ އިހުތިޔާރު ލިބިގެންވަނީ މަރުކަޒީ ބޭންކުގެ ގަވަރުނަރަށެވެ.
ކޮމެންޓު ފޮނުވާ