މިއަދަކީ ބޮލީވުޑްގެ މަޝްހޫރު އެކްޓަރ އަދި ކުޅަދާނަ ނެށުންތެރިޔާ ރިތިކް ރޯޝަންގެ 47 ވަނަ އުފަންދުވަހެވެ. ރިތިކްގެ އުފަންދުވަހުގެ ހަދިޔާއެއްގެ ގޮތުން އޭނާ ވަނީ ފޭނުންނަށް އޭނާގެ ކުރިއަށްއޮތް ފިލްމުގެ މައުލޫމާތުތައް ހިއްސާކޮށްފައެވެ.
ރިތިކް ކޮށްފައިވާ ޓްވީޓެއްގައި އޭނާގެ އަޑުން ނޭޓްކޮށްފައިވާ ވީޑިއޯއެއްގައި ބުނަނީ އޭނާގެ ފިލްމު "ފައިޓަރ" އަންނަ އަހަރުގެ ސެޕްޓެމްބަރުމަހުގެ 30 ވަނަ ދުވަހު ބެލުންތެރިންނާ ހަމައަށް އަންނާނެކަމަށެވެ. ޔަގީނުންވެސް އެކްޝަން ފިލްމުތަކަށް ލޯބިކުރާ ފަރާތްތަކުން އެންމެ ބޮޑު އިންތިޒާރެއް ކުރާނެ ފިލްމަކަށް މިފިލްމު ވެގެންދާނެއެވެ.
ދީޕިކާ ޕަޑްކޯން އާއި ރިތިކްގެ ޖޯޑު އެކުގައި ފެނުމަށް އިންތިޒާރުގައި ތިބި އެންމެނަށް މިއީ ދިގު އިންތިޒާރެއް ނަމަވެސް އުފާވެރި ޚަބަރެކެވެ. މި ދެ ތަރިން އެކުގައި ފިލްމެއް ކުޅެން އުޅޭ ވާހަކަ އަކީ ދޭތެރެ ދޭތެރެއިން މީޑިއާ ތަކަށް ތިލަވާ ވާހަކައެކެވެ. ނަމަވެސް އަދި މިހާތަނަށް މިކަން އޮތީ ހާސިލްނުވެއެވެ.
Presenting a glimpse of the MARFLIX vision as #Fighter! Looking forward to my first flight alongside the exceptional @deepikapadukone. All buckled up for this #SiddharthAnand joyride. pic.twitter.com/gaqv53xbO9
— Hrithik Roshan (@iHrithik) January 10, 2021
ރިތިކުގެ އެންމެ ފަހުގެ ފިލްމް އަދި 2019 ވަނަ އަހަރުގެ ބްލޮކްބާސްޓަރ "ވޯރ" ލިޔެ ޑައިރެކްޓްކޮށްދިން ސިދާތު އާނަންދު ޑައިރެކްޓްކުރާ މި ފިލްމަކީ ރިތިކާއި ދީޕިކާ އެކީގައި ސްކްރީން ދެކިލަން ކެތްމަދުވެފައި ތިބި ފޭނުންނަށް ރިތިކްގެ ފަރާތުން ދިން އުފަންދުވަހުގެ ސަޕްރައިޒް އެކެވެ. އެކަން އެނގިގެން ދަނީ ރިތިކް މި ފިލްމު އިއުލާން ކުރި ޕޯސްޓަށް ފޭނުން ކުރަމުންދާ ކޮމެންޓް ތަކާއި ރިއެކްޓް ތަކުންނެވެ.
ރިތިކްގެ އެންމެ ފަހުގެ ފިލްމު "ވޯރ" ބްލޮކްބާސްޓަރ އަކަށް ވީއިރު، ދީޕިކާ އެންމެ ފަހުން ފެނިފައި ވަނީ މިދިޔަ ޖަނަވަރިމަހު ރިލީސްކުރި "ޗައްޕާކް" އިންނެވެ. މިދިޔަ އަހަރު މުޅި ދުނިޔެއަށް ކުރިމަތިވި ކޮރޯނާގެ އަސަރު މި ފިލްމުގެ ވިޔަފާރިއަށްވެސް ވަނީ ކޮށްފައެވެ. އެ ފިލްމަކީ އެސިޑްގެ ހަމަލާއެއް އަމާޒުވި އަންހެން ކުއްޖެއްގެ ހަގީގީ ވާހަކައެއްގެ މައްޗަށް ބިނާކޮށް ހަދާފައިވާ ފިލްމެކެވެ.
