ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަރާތުން ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ އެތެރޭގެ އިންތިޚާބު ނުވަތަ ޕްރައިމަރީގެ ވޯޓުލުން މިއަދު މެންދުރުފަހު ފަށައިގެން ކުރިއަށް އެބަދެއެވެ. މިއަދު މެންދުރުފަހު 2:30 ގައި ފެށުނު މި ވޯޓުލުން މިރޭ 8:00 ޖަހަންދެން ކުރިއަށްދާނެކަމަށް އެ ޕާޓީން ވަނީ ހާމަކޮށްފައެވެ.
މި އިންތިޚާބުގެ ވޯޓުލުން މާލެ ސަރަހައްދުގެ އިތުރުން އަތޮޅުތަކުގެ އެކި ރަށްރަށުގައިވެސް ކުރިއަށްދާއިރު، ވޯޓު ފޮށިތައް ބަހައްޓާފައިވަނީ ސްކޫލްތަކުގައެވެ. މާލޭގައި ވޯޓުލުން ކުރިއަށްދާ މަރުކަޒުތަކުގެ ތެރޭގައި މަޖީދިއްޔާ ސްކޫލް، އިސްކަންދަރު ސްކޫލް، ހިރިޔާ ސްކޫލް އަދި ގަލޮޅު މަދުރަސާ ހިމެނެއެވެ. މީގެ އިތުރުން ހުޅުމާލޭގައި ދިރިއުޅޭ މެންބަރުންނަށް ޣާޒީ ސްކޫލާއި ކާމިލްދީދީ ސްކޫލުގައި ވޯޓުލުމުގެ އިންތިޒާމު ހަމަޖެހިފައިވާއިރު، ވިލިމާލޭގައި ވޯޓު ފޮށި ބަހައްޓާފައިވަނީ މުޙްޠިއްދީން ސްކޫލުގައެވެ.
އެމްޑީޕީން އާންމުކޮށްފައިވާ ކެންޑިޑޭޓުންގެ ލިސްޓަށް ބަލާއިރު، މި ފަހަރުގެ ޕްރައިމަރީގައި ޖުމްލަ 152 ކެންޑިޑޭޓުން ވާދަކުރެއެވެ. މީގެ ތެރޭގައި ރަށު ކައުންސިލްތަކުގެ ރައީސްކަމާއި މެންބަރުކަމުގެ ޓިކެޓް ހޯދުމަށް ވާދަކުރާ ފަރާތްތަކުގެ އިތުރުން، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ރައީސްކަމާއި މެންބަރުކަމަށް ޝައުޤުވެރިވާ ފަރާތްތައްވެސް ހިމެނެއެވެ. މިއީ ޕާޓީގެ ޓިކެޓް ކަށަވަރުކުރުމަށް މެންބަރުންގެ މެދުގައި ބާއްވާ ވާދަވެރި އިންތިޚާބެކެވެ.
މި އިންތިޚާބު ސްކޫލްތަކުގައި ބޭއްވުމުގެ ފުރުޞަތު ލިބިފައިވަނީ، ސިޔާސީ ހަރަކާތްތަކަށް ސްކޫލްތައް ބޭނުންކުރުމާ ގުޅޭގޮތުން ސަރުކާރުން ގެންގުޅުއްވާ ސިޔާސަތަށް ގެނައި ހެޔޮ ބަދަލަކާ ގުޅިގެންނެވެ. މީގެ ކުރިން ސިޔާސީ ޕާޓީތަކުގެ ހަރަކާތްތަކަށް ސްކޫލްތައް ދޫކުރުމުގައި ބޮޑެތި ހުރަސްތަކެއް ހުރި ނަމަވެސް، މިހާރުގެ ސަރުކާރުން ވަނީ ކިޔެވުމަށް ދަތިނުވާނެ ގޮތުގެ މަތިން، ބަންދު ދުވަސްތަކުގައި ހުރިހާ ސިޔާސީ ޕާޓީތަކަށްވެސް ހަމަހަމަ އުސޫލަކުން ސްކޫލްތައް ބޭނުންކުރުމުގެ މަގު ފަހިކޮށްދީފައެވެ.
ކޮމެންޓު ފޮނުވާ