ރާއްޖޭގެ ސިއްހީ ދާއިރާގެ ޚަރަދުތަކާ ގުޅޭގޮތުން އޮޑިޓަރ ޖެނެރަލްގެ އޮފީހުން ނެރެފައިވާ ރިޕޯޓުން ދައްކާގޮތުގައި، ފާއިތުވި ފަސް އަހަރު ދުވަހުގެ ތެރޭގައި ޒަކާތު ފަންޑުން އެކަނިވެސް ބޭސްފަރުވާގެ ކަންކަމަށް 97.7 މިލިއަން ރުފިޔާ ވަނީ ހޭދަކޮށްފައެވެ. މިއީ އާސަންދައާއި އެންސްޕާގެ އިތުރުން، ރައްޔިތުންގެ ސިއްހީ ކަންކަމަށް ދައުލަތުން ކުރަމުންދާ ބޮޑު ހޭދައެއްކަން މި ރިޕޯޓުން ވަނީ ފާހަގަކޮށްފައެވެ.
ޒަކާތު ފަންޑުގެ އެހީއަކީ ވަކި ހާއްސަ އުސޫލުތަކެއްގެ ދަށުން ދެވޭ އެހީއެކެވެ. މައިގަނޑު ގޮތެއްގައި މި ފަންޑުން އެހީތެރިކަން ފޯރުކޮށްދެނީ، އާސަންދައިގެ ދަށުން ނުވަތަ އެނޫންވެސް ހަމައަކުން އެހީ ނުލިބޭ ފަރާތްތަކަށާއި، ލިބޭ އެހީއަކުން ބޭސްފަރުވާގެ ހަރަދުތައް ހަމަނުޖެހޭ ފަދަ ދަތި ހާލަތްތަކުގައި ތިބޭ ރައްޔިތުންނަށެވެ. އޮޑިޓް ރިޕޯޓްގައިވާ ތަފާސްހިސާބުތަކަށް ބަލާއިރު، 2019 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް ބޭސްފަރުވާއަށް ކުރެވުނު ހޭދަ އަހަރަކު 3 އިންސައްތައިން އަންނަނީ އިތުރުވަމުންނެވެ.
މި މުއްދަތުގެ ތެރޭގައި ޒަކާތު ފަންޑުން އެންމެ ބޮޑު ހޭދައެއް ކޮށްފައިވަނީ ބޮޑެތި ބަލިތަކަށް ފަރުވާ ހޯދަމުންދާ މީހުންނަށެވެ. ތަފާސްހިސާބުތައް ދައްކާގޮތުން ކެންސަރު ބަލީގެ މީހުންނަށް 3.5 މިލިއަން ރުފިޔާ ހޭދަކޮށްފައިވާއިރު، ގުނަވަން ބަދަލުކުރުމުގެ (ޓްރާންސްޕްލާންޓް) އޮޕަރޭޝަންތަކަށް 2.4 މިލިއަން ރުފިޔާ ވަނީ ހޭދަކޮށްފައެވެ. މީގެއިތުރުން ސިކުނޑީގެ އޮޕަރޭޝަންތަކަށް 1.2 މިލިއަން ރުފިޔާ، ހިތުގެ އޮޕަރޭޝަންތަކަށް ގާތްގަނޑަކަށް ހަ ލައްކައެއްހާ ރުފިޔާ އަދި ކިޑްނީގެ ބަލިތަކަށް ފަސް ލައްކަ ފަސްދޮޅަސް ހާހަށްވުރެ ގިނަ ރުފިޔާ ވަނީ ހޭދަކޮށްފައެވެ.
ފާހަގަކޮށްލެވޭ އަނެއް ކަމަކީ، ޒަކާތު ފަންޑުން ރާއްޖޭގެ ހޮސްޕިޓަލްތަކަށް ކޮށްފައިވާ ހޭދައިގެ ބޮޑު ބައެއް އަމިއްލަ ހޮސްޕިޓަލްތަކަށް ހިއްސާވުމެވެ. އޮޑިޓް ރިޕޯޓުގައި ބަޔާންކޮށްފައިވާ ގޮތުގައި މި މުއްދަތުގައި ރާއްޖޭގެ ހޮސްޕިޓަލްތަކަށް ކުރި ހޭދައިގެ 72 އިންސައްތަ ހޭދަކޮށްފައިވަނީ ޕްރައިވެޓް ހޮސްޕިޓަލްތަކަށެވެ.
ބޭސްފަރުވާގެ ހަރަދުތައް އަހަރުން އަހަރަށް އިތުރުވަމުން ދިޔަ ނަމަވެސް، ޒަކާތު ފަންޑަށް ލިބޭ އާމްދަނީވެސް އަންނަނީ އިތުރުވަމުންނެވެ. އެގޮތުން ނިމިދިޔަ އަހަރަކީ ޒަކާތު ފަންޑަށް ރެކޯޑު އަދަދަކަށް ފައިސާ ލިބުނު އަހަރެއް ކަމަށާއި، އެ އަހަރު އެކަނިވެސް 107 މިލިއަނަށްވުރެ ގިނަ ރުފިޔާ ފަންޑަށް ލިބިފައިވާކަމަށް ރިޕޯޓުގައިވެއެވެ.
ކޮމެންޓު ފޮނުވާ