މާލެ ސަރަހައްދުގައި ގަވާއިދާ ޚިލާފަށް ހިންގަމުންދިޔަ 104 މަސާޖު ޕާލާއެއް މިދިޔަ އެއް މަސް ދުވަހުގެ ތެރޭގައި ބަންދުކޮށްފައިވާ ކަމަށާއި، އަދިވެސް އެފަދަ 200 އަށްވުރެ ގިނަ ތަންތަން އެބަހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ޕީއެންސީގެ އޮފީސް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ، މުޖުތަމައުގައި ހުރި ނޭދެވޭ އާދަތައް ހުއްޓުވުމަށް ސަރުކާރުން ޚާއްސަ އިސްކަމެއް ދީފައިވާ ކަމަށާއި، މިދިޔަ ޑިސެމްބަރު 9 ވަނަ ދުވަހު ފެށި ޚާއްސަ އޮޕަރޭޝަންގެ ދަށުން ގިނަ ތަންތަން ބަންދުކުރެވިފައިވާ ކަމަށެވެ.
ރައީސް ފާހަގަކުރެއްވި ގޮތުގައި ކަމާބެހޭ އިދާރާތަކުގެ ތަފާސްހިސާބުތަކުން ދައްކާ ގޮތުގައި އަދިވެސް ބަންދުކުރަން ޖެހޭ 200 އަށްވުރެ ގިނަ ތަންތަން މާލޭގައި އެބަހުއްޓެވެ. އެހެންކަމުން، އެތަންތަން ހިންގާ ފަރާތްތަކުން އަމިއްލައަށް އެކަން ހުއްޓާލައި، ގަވާއިދާ ޚިލާފަށް ނުވަތަ ޓޫރިސްޓް ވިސާގައި ގެނެސްފައި ތިބި ބިދޭސީން އަނބުރާ ފޮނުވާލުމަށް ރައީސް ވަނީ އިލްތިމާސްކުރައްވާފައެވެ.
މިފަދަ ތަންތަން ހިންގުމުގައި ބިދޭސީންގެ ބައިވެރިވުން ބޮޑުއިރު، އިމިގްރޭޝަނުން ގެންދަނީ ގަވާއިދާ ޚިލާފަށް އުޅޭ ބިދޭސީން ހޯދައި ފިޔަވަޅު އެޅުމުގެ މަސައްކަތް ވެސް ބާރަށް ކުރަމުންނެވެ. ރައީސް ވިދާޅުވީ ކުރީގެ ސަރުކާރުތަކުން މިކަމަށް އެކަށީގެންވާ ހައްލެއް ގެނެވިފައިނުވީ ނަމަވެސް، މި ސަރުކާރުން އިސްލާމީ އުސޫލުތަކާ އެއްގޮތަށް ގައުމުގެ ކަންކަން ބައްޓަންކުރުމަށް ދެމިތިބޭނެ ކަމަށެވެ.
ކޮމެންޓު ފޮނުވާ