މި ސަރުކާރުގެ ފުރަތަމަ އެގްރިކަލްޗާ މިނިސްޓަރު ޑރ. އާއިޝަތު ރަމީލާ، ހިއުމަން ރައިޓްސް ކޮމިޝަން (އެޗްއާރްސީއެމް)ގެ ރައީސްކަމަށް އައްޔަންކުރުމަށް ރައްޔިތުންގެ މަޖިލީހަށް ފޮނުއްވައިފިއެވެ. ރައީސް ޑރ. މުހައްމަދު މުއިއްޒު ރަމީލާގެ ނަން ފޮނުއްވީ މިދިޔަ ޑިސެމްބަރު މަހުގެ ތިންވަނަ ދުވަހުގައި ނަމަވެސް، މަޖިލީހުން އެ ނަން އިއުލާންކުރެއްވީ މިއަދުއެވެ.
ރަމީލާ އެޗްއާރްސީއެމަށް މެންބަރެއްގެ ގޮތުގައި އައްޔަންކުރީ މިދިޔަ އޮކްޓޯބަރު މަހުގެ 29ވަނަ ދުވަހުގައެވެ. އޭނާ މިނިސްޓަރުކަމުން އިސްތިއުފާދެއްވީ ކެންސަރަށް ފަރުވާހޯދުމަށް ޑިސެމްބަރު މަހުގެ ފުރަތަމަ ދުވަހުއެވެ. ދައުރުން ބޭރުގައި މިހާރު ކުރިއަށްދާ މަޖިލީހުގެ ޖަލްސާގައި ރަމީލާގެ ނަން ދިރާސާކުރުމަށް ހިއުމަން ރައިޓްސް ކޮމިޓީއަށް ފޮނުވައިފިއެވެ.
ސޯޝަލް ސައިންސްގެ ދާއިރާއިން ޕީއެޗްޑީ ހާސިލުކުރައްވާފައިވާ ރަމީލާ، ދެ ފަހަރެއްގެ މަތިން ހެލްތު މިނިސްޓްރީގެ ސްޓޭޓް މިނިސްޓަރުކަމުގައި ވެސް ހުންނެވިއެވެ. އެޗްއާރްސީއެމްގައި މިހާރު ފަސް މެންބަރުން ތިއްބަވާއިރު، އޭގެ ތެރޭގައި ނައިބު ރައީސް މުހައްމަދު ޝަފީޤް މަހްމޫދާއި، ސަމާޢު އަހުމަދު ނަޖީބު، އިސްމާޢީލް ޙަބީބު ޢަބްދުއްރަޙީމް އަދި އަހުމަދު މަޤުސޫމް ހިމެނިވަޑައިގަންނަވައެވެ.
ކޮމެންޓު ފޮނުވާ