އައު އަހަރާ ދިމާކޮށް ކޮންމެ އަހަރަކު ވެސް ކުރިއަށްގެންދާ އޮޕަރޭޝަން "ރިވެލި" ދިވެހި ފުލުހުންގެ ޚިދުމަތުން ޑިސެމްބަރު 24 ވަނަ ދުވަހު ވަނީ ފަށާފައެވެ. މި އޮޕަރޭޝަން ޖަނަވަރީ 3 ވަނަ ދުވަހުގެ ނިޔަލަށް ކުރިއަށްދާއިރު، މާލެ ސަރަހައްދާއި ރާއްޖޭގެ ހުރިހާ ރަށެއްގައި ގިނަ އަދަދެއްގެ ފުލުހުން މަގުމަތީގައި ހަރަކާތްތެރިވާނެއެވެ.
މި އޮޕަރޭޝަންގައި މާލެއާއި ހުޅުމާލޭގެ އެކި ސަރަހައްދުތަކުގައި ވީސީޕީ ގާއިމުކޮށް މީހުންނާ ސުވާލުކުރުމުގެ އިތުރުން ވެހިކަލްތައް ޗެކްކުރުމުގެ މަސައްކަތް ކުރިއަށްދާނެއެވެ. ވައްކަމާއި ފޭރުން ހުއްޓުވުމާއި، ބަނގުރަލާއި މަސްތުވާތަކެތީގެ މައްސަލަތަކާއި، ސައިލެންސަރު މޮޑިފައިކޮށްގެން އަޑުގަދަކޮށް ދުއްވާ ފަރާތްތަކަށް ހާއްސަ ސަމާލުކަން ދެވޭނެއެވެ. އަދި އާންމު އިޖުތިމާއީ މިންގަނޑުތަކާ ހިލާފަށް އުޅޭ މީހުން ހުއްޓުވައި ގާނޫނާއި ގަވާއިދުތަކުގެ ތެރެއިން ކުރަންޖެހޭ ކަންކަން ކުރަމުންގެންދާނެއެވެ.
މީގެ އިތުރުން ސްކޫލު ބަންދާއި އައު އަހަރާ ދިމާކޮށް ގިނަބަޔަކު ރަށްރަށަށް ދަތުރުކުރާތީ، މެރިން ޕޮލިހުން ކަނޑު އުޅަނދުފަހަރު ބަލައިފާސްކުރުމުގެ ހަރަކާތެއް ވަނީ ފަށާފައެވެ. މި ހަރަކާތުގައި ޕަސިންޖަރުން ގޮވައިގެން ދަތުރުކުރާ ފެރީތަކާއި، މުދާ ބަރުކޮށްގެން އަތޮޅުތަކަށް ދަތުރުކުރާ އޮޑިދޯނިފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް ސަލާމަތީގޮތުން ފުރިހަމަކުރަންޖެހޭ ކަންކަން ފުރިހަމަކޮށްފައިވޭތޯ ބަލަމުންގެންދާނެއެވե. އެއާއެކު، ކަނޑުމަތީގެ ސަލާމަތާބެހޭ ގޮތުން ކެޕްޓަނުންނާއި ފަޅުވެރިން ހޭލުންތެރިކުރުމަށް މައުލޫމާތު ދެމުންގެންދާނެއެވެ. މި އޮޕަރޭޝަން ކުރިއަށްދަނީ ކަސްޓަމްސް، އިމިގްރޭޝަން، މޯލްޑިވްސް ޕޯޓްސް އަދި ކޯސްޓްގާޑުގެ އެހީތެރިކަމާއެކުގައެވެ.
ކޮމެންޓު ފޮނުވާ