ސޯޝަލް މީޑިއާގެ ޕްލެޓްފޯމް ޓިކްޓޮކްގައި ފެންމަތިވި 13 އަހަރުގެ އަންހެންކުއްޖަކު ވިއްކަން އިއުލާންކުރި މައްސަލަ ޖިނާއީ މައްސަލައެއްގެ ގޮތުގައި ކޯޓަށް ހުށަހަޅައި، މިހާރު އެ މައްސަލައިގެ ފުރަތަމަ އަޑުއެހުން ބާއްވައިފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ހުޅުމާލެ ފޭސް އެކެއްގެ ރައްޔިތުންގެ ބައްދަލުވުމުގައި މި މައްސަލައިގައި ހިމެނޭ އަންހެންކުއްޖާގެ މަންމަ ދެއްކެވި ވާހަކަފުޅުގައި ބުނީ އެ ޕޯސްޓު ކުރި މީހާ އަދިވެސް މިނިވަންކޮށް، އެއްވެސް ފިޔަވަޅެއް އަޅާފައި ނުވާކަމަށެވެ. ރައީސްގެ ދެކަނބަލުންގެ ދަރިފުޅާ ގުޅުވައި އެއްވުމެއްގައި ދެއްކި ވާހަކައެއް ކޯޓަށް ގެންގޮސް ވަރަށް އަވަހަށް ނިމި ކޯޓުން ގޮތް ނިންމިކަމަށާއި، ނަމަވެސް ވަކި ބަޔަކަށް ވަކި ގޮތެއް އޮންނަންވީ ކީއްވެތޯ އެ އަންހެން މީހާ ސުވާލު ކުރެއްވިއެވެ.
މި ޝަކުވާއާ ގުޅޭގޮތުން ރައީސް ވިދާޅުވީ މީޑިއާއިން އެ މީހާ ދޫކޮށްލާފައިވާކަމުގެ މައުލޫމާތު ފެނުމާއެކު، އެ މައްސަލައިގެ ތަހުގީގު ކުރިޔަށްދާ ގޮތް ހޯއްދެވިކަމަށާއި، އެ އަމަލު ހިންގި މީހާ ދޫކޮށްފައި ހުރިނަމަވެސް ފަހުން އޭނާ ހައްޔަރުކޮށް ތަހުގީގު ކުރިޔަށް ގެންގޮސް މިހާރު ދައުވާކޮށްފައިވާކަމަށެވެ. ކުޑަކުދިންނަށް ލިބޭ އަނިޔާއާއި ފުރައްސާރައިގެ މައްސަލަތަކަކީ އެމަނިކުފާނު ވަރަށް އިސްކަމެއް ދެއްވާ ކަމެއްކަމަށް ވިދާޅުވެ، އެއްވެސް މީހަކު އަދި އެއްވެސް ކުއްޖަކު ތަފާތު ނުކުރައްވާނެކަމުގެ ޔަގީންކަން ރައީސް ދެއްވިއެވެ. އަދި އެމަނިކުފާނުގެ އަނބިކަބަލުން ވެސް އެފަދަ ވިސްނުމެއް ނުގެންގުޅުއްވާނެކަމަށް ވިދާޅުވެ، މި މައްސަލައިގައި ސަރުކާރުގެ ފަރާތުން އެއްވެސް ކަހަލަ އިހުމާލެއް ވެފައި ނުވާނެކަމަށް ރައީސް ވިދާޅުވިއެވެ.
ކޮމެންޓު ފޮނުވާ