ގާނޫނާއި ހިލާފަށް މާލޭގައި މަސާޖު ޕާލާގެ ނަމުގައި ހަށިވިއްކުމުގެ ވިޔަފާރި ކުރަމުންދާ ތަންތަނަށް ހާއްސަކޮށް ހިންގި އޮޕަރޭޝަނެއްގައި މިހާތަނަށް 83 ތަނެއް ބަންދުކޮށްފައިވާ ކަމަށް ރައީސް ޑރ. މުހައްމަދު މުއިއްޒު ހާމަކުރައްވައިފިއެވެ. މި މަހުގެ 9 ވަނަ ދުވަހު ފެށި މި އޮޕަރޭޝަނަކީ ރާއްޖޭގެ ތާރީހުގައި އެންމެ ގިނަ މަސާޖު ޕާލާތަކެއް ބަންދުކުރެވުނު އޮޕަރޭޝަން ކަމަށް ރައީސް ފާހަގަކުރެއްވިއެވެ.
ރައީސް މިހެން ވިދާޅުވީ ހުޅުމާލޭ ފުރަތަމަ ފިޔަވަހީގެ ރައްޔިތުންނާއި ރޭ ރެހެންދި ސްކޫލުގައި ބައްދަލުކުރެއްވުމުގައި ވާހަކަފުޅު ދައްކަވަމުންނެވެ. މިއީ ރައްޔިތުންނާ ގާތުން ބައްދަލުކުރެއްވުމަށް ރައީސް ފައްޓަވާފައިވާ ސިލްސިލާ ބައްދަލުވުންތަކުގެ ތެރެއިން އެކެވެ.
ރައީސް ވިދާޅުވީ ސެލޫންތަކުގެ ނަމުގައި ގާނޫނާއި ދީނީ ހަމަތަކާ ހިލާފަށް ހިންގާ މަސާޖު ޕާލާތަކާ ބެހޭ ގޮތުން ރައްޔިތުން އަބަދުވެސް ޝަކުވާ ކުރަމުން އަންނަ ކަމަށެވެ. ރައްޔިތުންގެ ޝަކުވާއާއި ގުޅިގެން އިކޮނޮމިކް މިނިސްޓްރީ، އިމިގްރޭޝަން އަދި ފުލުހުން ގުޅިގެން ހާއްސަ ޓާސްކް ފޯހަކުން މި މަސައްކަތް ފަށާފައިވާނެއެވެ. ރައީސް ވިދާޅުވީ މިދިޔަ 12 ދުވަހުގެ ތެރޭގައި ބަންދުކުރެވިފައިވާ މަސާޖު ޕާލާތަކުގެ އަދަދާ ގާތްކުރާ ވަރަށް ވެސް ދުވަހަކު ބަންދުކޮށްފައި ނުވާނެ ކަމަށެވެ.
ކޮމެންޓު ފޮނުވާ