މިދިޔަ ހަފްތާގައި ފުލުހުންނަށް ޖުމްލަ 45 ސްކޭމް މައްސަލަ ހުށަހެޅިފައިވާއިރު، މި މައްސަލަތަކުގައި ގެއްލުނު ޖުމްލަ 591،751.47 ރުފިޔާގެ ތެރެއިން 130،287.80 ރުފިޔާ އަނބުރާ ހޯދައިދެވިފައިވާ ކަމަށް ފުލުހުން ހާމަކުރައްވައިފިއެވެ.
ރިޕޯޓުކުރެވުނު މައްސަލަތަކުގެ ތެރެއިން އެންމެ ގިނައީ އީ-ކޮމާސްގެ ސްކޭމް މައްސަލަތަކެވެ. އެގޮތުން 17 މައްސަލައެއް އީ-ކޮމާސްއާ ގުޅޭ ކަމަށް ފުލުހުން ބުނެއެވެ. މީގެ އިތުރުން އިންޕާސަނޭޝަންގެ 7 މައްސަލައާއި، ކަރަންސީ އެކްސްޗޭންޖުގެ 5 މައްސަލައެއްވެސް ހިމެނެއެވެ. އަދި ފިޝިން، ވިޝިން އަދި ޖޮބް ސްކޭމްގެ 4 މައްސަލައާއި އެހެނިހެން 12 މައްސަލަވެސް ރިޕޯޓުކުރެވިފައިވެއެވެ.
ސްކޭމްގެ މައްސަލަތަކަކީ ދުވަހެއް ދުވަހަކަށް އާންމުވަމުންދާ މައްސަލަތަކެއް ކަމަށާއި، މިފަދަ މައްސަލަތައް ދިމާވުމުން ހަނުހުރުމަކީ ގެއްލުން ބޮޑުކޮށް، ސްކޭމަރުންނަށް ކާމިޔާބު ލިބިގެންދާނެ ކަމެއް ކަމަށް ފުލުހުން ވަނީ ފާހަގަ ކޮށްފައެވެ. ގެއްލުނު ފައިސާގެ ބޮޑު އަދަދެއް ރިކަވަރކުރެވިފައިވުމަކީ، ސްކޭމްގެ މައްސަލަތައް އަވަސް އަވަހަށް ރިޕޯޓުކުރުމުން ގެއްލުނު ފައިސާ އަނބުރާ ހޯދުމަށް ފަސޭހަވާކަން ސާބިތުކޮށްދޭ ކަމެކެވެ.
މަކަރާއި ހީލަތުގެ މައްސަލައެއް ދިމާވެއްޖެނަމަ، ލަސްނުކޮށް 911 ނުވަތަ 125 (އެކްސްޓެންޝަން 2020) އަށް ގުޅުއްވުމަށް ނުވަތަ [email protected] އަށް އީމެއިލް ކުރުމަށް ފުލުހުން އިލްތިމާސްކުރައްވައިފިއެވެ.
ކޮމެންޓު ފޮނުވާ