ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ގަލޮޅު ރައްޔިތުންނާ ބައްދަލުކުރައްވާނެއެވެ. ރައީސް އޮފީހުގެ ތަރުޖަމާނު ހީނާ ވަލީދު ސޯޝަލް މީޑިއާގައި ހިއްސާކުރެއްވި މެސެޖެއްގައި ވިދާޅުވީ މިރޭގެ ބައްދަލުކުރެއްވުން ކުރިއަށްދާނީ 20:30ގައި ޢިމާދުއްދީން ސްކޫލްގައި ކަމަށެވެ.
މި ބައްދަލުކުރެއްވުމުގެ މަޤްސަދަކީ ރައްޔިތުންގެ ޚިޔާލާއި މަޝްވަރާ ހޯއްދެވުމަށާއި، އެބޭފުޅުން ކަންބޮޑުވާ ކަންތައްތައް ސީދާ އަޑުއައްސަވައި، ރައްޔިތުން ހިއްސާކުރައްވަން ބޭނުންފުޅުވާ ކަންކަން ދެނެގަތުމެވެ. ގަލޮޅުގައި ދިރިއުޅޭ ހުރިހާ ރައްޔިތުންނަށް މި ބައްދަލުވުމަށް ދައުވަތު އަރުވާފައިވެއެވެ.
މާލެ ސަރަޙައްދުގެ ރައްޔިތުންނާ ބައްދަލުކުރެއްވުމަށް ރައީސް ފެއްޓެވި ހަރަކާތުގެ ތެރެއިން ވިލިމާލެ، މައްޗަންގޮޅި، މާފަންނު އަދި ހެންވޭރު ރައްޔިތުންނާ ވަނީ ބައްދަލުކުރައްވާފައެވެ. ރައީސް މުޢިއްޒު ވެރިކަމާ ހަވާލުވެވަޑައިގެންނެވީ ރައްޔިތުންނާ ގާތުން މަސައްކަތް ކުރައްވާނެ ވަޢުދުފުޅާއެކުގައެވެ. އެ ވަޢުދުފުޅު ފުއްދަވަމުން ގެންދަވާއިރު، ރާއްޖޭގައި މީހުން ދިރިއުޅޭ ހުރިހާ ރަށަކަށް ވަޑައިގެން ރައްޔިތުންނާ ބައްދަލުކުރައްވައި، ކައުންސިލްތަކާއި މަޝްވަރާކޮށް، ރައްޔިތުންގެ ކަންބޮޑުވުންތައް ޙައްލުކުރެއްވުމަށް މަސައްކަތް ކުރައްވަމުން ގެންދަވައެވެ.
ކޮމެންޓު ފޮނުވާ