ފުލުހުންގެ 41ވަނަ އަސާސީ ތަމްރީން ޕްރޮގްރާމް ނިންމި ދަރިވަރުންގެ ދަސްވެނިވުމުގެ ރަސްމިއްޔާތުގައި ވާހަކަދައްކަވަމުން ހޯމް މިނިސްޓަރު އަލީ އިހުސާން ވަނީ ރިޝްވަތާއި ކޮރަޕްޝަނުގައި ފުލުހުން ނުޖެހުމަށް އިލްތިމާސްކުރައްވައިފައެވެ.
އިހުސާން ވިދާޅުވީ މިހާރުގެ މާހައުލުގައި ކޮރަޕްޝަން އޮންނަކަމަށާއި މީހުން ފައިސާ ބަހައި ފައިސާ ދިއްކުރަމުންދާކަމަށެވެ. މީހުން މަގާމުގެ ކުރިއެރުމަށާއި އުފާވެރި ދިރިއުޅުންތަކަށް ޕްރޮމިސްކުރާނެކަމަށް ވިދާޅުވެ، އެހެންނަމަވެސް ހޯދި ތަމްރީނާއި މިއަދު ދެއްކި ސާބިތުކަން ދުއްވާލައިގެން ނުވާނެކަމަށް އިހުސާން ވިދާޅުވިއެވެ.
މިނިސްޓަރު ވިދާޅުވީ ފުލުހުންގެ މުއައްސަސާގައި ކޮރަޕްޝަނަށް ޒީރޯ ޓޮލަރެންސް އޮންނާނެކަމަށާއި މިފަދަ ބަލި މަޑުކަމެއްގައި އެއްވެސް ފުލުހަކު ނުޖެހުމަށް ނަސޭހަތްތެރިވެވަޑައިގަންނަވާ ކަމަށެވެ. މިގޮތަށް މަސައްކަތްކޮށްފިނަމަ ރައްޔިތުން އެދޭފަދަ އަމާން ރާއްޖެއެއް ގާއިމުވެގެންދާނެކަމަށް އިހުސާން ވިދާޅުވިއެވެ.
އިހުސާން ވަނީ ފުލުހުންގެ ޚިދުމަތް ފުޅާކުރުމަށް ކުރަމުންދާ މަސައްކަތްތަކަށްވެސް އަލިއަޅުވާލައްވައިފައެވެ. ރާއްޖޭގެ ހުރިހާ ރަށެއްގައި ފުލުހުންގެ އަމިއްލަ އިދާރާއެއް ޤާއިމުކުރުމުގެ މަސައްކަތް ފަށާފައިވާކަމަށާއި 140އަށްވުރެ ގިނަ ރަށުގައި މި މަސައްކަތް އަންނަ އަހަރެއްހާ ދުވަހުގެ ތެރޭގައި ނިންމާލެވޭނެކަމަށް ވިދާޅުވިއެވެ.
ކޮމެންޓު ފޮނުވާ