ފުލުހުންގެ ހިދުމަތަށް ނިސްބަތްވާ އަސާސީ ތަމްރީން ކޯހުގެ 41ވަނަ ބެޗުގެ ކިޔެވުން ނިންމާލައި ޝަރަފުގެ ހިނގާލުން ބާއްވައިފިއެވެ. މި ކޯހުން ބެސްޓް އޯލްރައުންޑަކަށް ހޮވުނީ ގދ. ފިޔޯރީއަށް ނިސްބަތްވާ އިމްޝާ އަބްދުއްލަތީފެވެ. އިމްޝާ 2019ވަނަ އަހަރު ގއ. ގެމަނަފުށީ ސުކޫލުން އޯލެވެލް ފުރިހަމަކުރި އެވެ. އޭނާ ފުލުހުންގެ ހިދުމަތަށް ގުޅުނީ 2023ވަނަ އަހަރުގެ ޑިސެމްބަރު މަހުގެ އެކެއްގައެވެ.
މިދިޔަ އޯގަސްޓު މަހު އައްޑޫ ސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ މަރުކަޒުގައި ފެށި މި ކޯހުގައި 210 ފުލުހުން ބައިވެރިވި އެވެ. ނަމަވެސް ކޯސް ފުރިހަމަ ކުރީ 185 ދަރިވަރުންނެވެ. އޭގެ ތެރޭގައި 107 ފިރިހެން ފުލުހުންނާއި 78 އަންހެން ފުލުހުން ހިމެނެއެވެ.
އަސާސީ ތަމްރީން ކޯހުގައި ފިޒިކަލް ޓްރެއިނިންގ، އޮޕަރޭޝަނަލް ސޭފްޓީ އެންޑް ޓެކްޓިކްސް، ގާނޫނާއި ގަވާއިދުތަކާއި ފުލުހުންގެ މަސައްކަތަށް ބޭނުންވާ ތަފާތު ދާއިރާތައް ކިޔަވައިދެއެވެ. މި ތަމްރީނުގެ މަގުސަދަކީ ފުލުހުންގެ ވަޒީފާއަށް ބޭނުންވާ އިލްމީ ގާބިލުކަމާއި ހުނަރު ލިބިގަތުމެވެ.
ކޮމެންޓު ފޮނުވާ