ދެ ހަފްތާގައި ސްކޭމް ކޮށްގެން މިލިޔަނަކަށްވުރެ ގިނަ ރުފިޔާ ފޭރިގަނެފައިވޭ

މި މަހުގެ ފުރަތަމަ ދެ ހަފްތާގައި ސްކޭމް މައްސަލަތަކުގެ ސަބަބުން އެއް މިލިޔަން ރުފިޔާއަށްވުރެ ގިނަ ފައިސާ ފޭރިގަނެފައިވާ ކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.

ފުލުހުންގެ ތަފްސީލުތަކުން ދައްކާ ގޮތުގައި ޑިސެމްބަރު 1 އިން 14 އާ ހަމައަށް 98 ސްކޭމް މައްސަލަ ރިޕޯޓުކޮށްފައިވާއިރު، މި މައްސަލަތަކުގައި ޖުމުލަ 1،429،651.50 ރުފިޔާ ވަނީ ފޭރިގަނެފައެވެ. ނަމަވެސް ފުލުހުން ވިދާޅުވި ގޮތުގައި މި ފައިސާގެ ތެރެއިން 281،461.80 ރުފިޔާ އަނބުރާ ހޯދައިދެވިފައިވެއެވެ.

ރިޕޯޓް ކުރެވުނު މައްސަލަތަކުގެ ތެރެއިން އެންމެ ގިނައީ އީ-ކޮމާސް އާ ގުޅުންހުރި 32 މައްސަލައެވެ. އޮޅުވާލައިގެން އެހެން މީހެއްގެ ނަމުގައި ފައިސާ ހޯދުމުގެ 28 މައްސަލައާއި، ފިޝިންގ ލިންކް ބޭނުންކޮށްގެން 11 މައްސަލައާއި، ކަރަންސީ އެކްސްޗޭންޖުގެ 10 މައްސަލަ ވެސް ވަނީ ރިޕޯޓުކޮށްފައެވެ. އަދި 28 މައްސަލައަކީ އެހެނިހެން ބާވަތުގެ ސްކޭމް މައްސަލަތަކެވެ.

ސްކޭމް ކުރުމަށް މައިގަނޑު ގޮތެއްގައި ބޭނުންކޮށްފައިވަނީ ފޯން ކޯލް، އައިބޭ، އޮންލައިން މެސެޖިން ޕްލެޓްފޯމްތައް، ފިޝިންގ ލިންކް އަދި ފޭސްބުކް މާކެޓްޕްލޭސްއެވެ.

ސްކޭމްގެ މައްސަލަތައް އިތުރުވަމުން އަންނާތީ ކަމާބެހޭ ފަރާތްތަކުން އަންނަނީ ރައްޔިތުންނަށް ސަމާލުވުމަށް އިލްތިމާސްކުރަމުންނެވެ. އެގޮތުން އެއްވެސް ސަސްޕިޝަސް ލިންކަކަށް ނުފިއްތުމަށާއި، އެއްވެސް ފަރާތަކަށް ވެރިފިކޭޝަން ކޯޑު ހިއްސާ ނުކުރުމަށް އިރުޝާދު ދީފައިވެއެވެ. އަދި ދަންނަ މީހެއްގެ މެސެޖެއް ކަމުގައި ހީކުރެވިޔަސް، ފައިސާގެ މުޢާމަލާތްތައް ކުރުމުގެ ކުރިން ސަމާލުވެ ކަށަވަރުކުރުމަށް ވަނީ އިލްތިމާސްކޮށްފައެވެ.