އަންނަ އަންގާރަ ދުވަހު ރައީސުލްޖުމްހޫރިއްޔާ ޓރ.މުހައްމަދު މުއިއްޒު ގަލޮޅު ރައްޔިތުންނާ ބައްދަލުކުރައްވަން ހަމަޖެހިފައިވާ ކަމަށް ސަރުކާރުން ހާމަކޮށްފިއެވެ.
ސަރުކާރުގެ ތަރުޖަމާން ހީނާ ވަލީދު އެކްސްގައި ކުރެއްވި ޕޯސްޓެއްގައި ބުނެފައިވަނީ މި ބައްދަލުވުން ބާއްވަނީ ޑިސެމްބަރު 16 ވާ އަންގާރަ ދުވަހުގެ ރޭ 20:30 ގައި އިމާދުއްދީން ސްކޫލުގައި ކަމަށެވެ.
މި ސަރުކާރަށް ދެ އަހަރު ފުރުން ފާހަގަކުރަން މިދިޔަ މަހުގެ 17 ވަނަ ދުވަހު ބޭއްވި ހާއްސަ ޖަލްސާގައި ރައީސް މުއިއްޒު އިއުލާން ކުރެއްވީ ހުޅުމާލެ ހިމެނޭހެން މާލޭގެ ހުރިހާ އަވަށްތަކުގެ ރައްޔިތުންނާ ބައްދަލުކުރައްވާނެ ކަމަށެވެ. މިހާތަނަށް ވިލިމާލެ، މައްޗަންގޮޅި، މާފަންނު އަދި ހެންވޭރުގެ ރައްޔިތުންނާ ރައީސް ވަނީ ބައްދަލުކުރައްވާފައެވެ.
މިހާތަނަށް ބޭއްވި ބައްދަލުވުންތަކުގައި ވައުދުތައް ފުއްދަވައި ނުދެއްވުމާ ސަރުކާރުގެ ނާކާމިޔާބީތައް ފާހަގަކޮށް ގިނަ އަދަދެއްގެ ރައްޔިތުން ދަނީ ކަންބޮޑުވުންތައް ފާޅުކުރަމުންނެވެ. އެހެންކަމުން މި ބައްދަލުވުންތައް ވެފައިވަނީ ސަރުކާރަށް ޕްރެޝަރު ބޮޑުވާ ބައްދަލުވުންތަކަށެވެ.
ކޮމެންޓު ފޮނުވާ