ޖާސޫސް ކުރިކަމުގެ ތުހުމަތުގައި އެމެރިކާއިން ބޭނުން ވެފައިވާ، އަދި މިހާރު އިގިރޭސިވިލާތުގެ ޖަލުގައި ހައްޔަރު ކޮށްފައިވާ، ވިކިލީކްސްގެ ބާލީ، ޖޫލިއަން އަސާންޖް ކަފާލާތުގެދަށުން މިނިވަން ކުރެވެން ނެތްކަމަށް އިގިރޭސިވިލާތުގެ ލަންޑަނުގެ ކޯޓަކުން ނިންމައިފިއެވެ.

ކޯޓުގެ މިނިންމުން އިއްވަމުން، ލަންޑަންގެ ކޯޓުގެ ފަޑިޔާރު ވިދާޅުވީ، އަސާންޖް "ފިލައިގެން ދިއުމަށް އެހީތެރިވެދޭނެ އެތައްބަޔަކު ތިބި ކަމަށާއި" އަދި ކޯޓުން ކަފާލާތުގެ ދަށުން އޭނާ މިނިވަން ކޮށްފިނަމަ، އެބުރި ކޯޓަށް ހާޒިރު ނުކުރެވުމުގެ ފުރުރުސަތު ވަރަށް ބޮޑު ކަމަށެވެ.

ވެސްޓްމިންސްޓަރ މެޖިސްޓްރޭޓް ކޯޓުގެ ޑިސްޓްރިކްޓް ޖަޖް ވެނެއްސާ ބަރައިސްޓަރ އަންގާރަ ދުވަހު މިނިންމެވި ނިންމެވުމާއެކު، އަސާންޖް ހުންނަވާނީ، މިހާރުވެސް އޭނާ ބަންދު ކުރެވިފައިވާ، ރައްކާތެރިކަމުގެ ފިޔަވަޅުތައް ވަރުގަދަ، އިގިރޭސިވިލާތުގެ ކެޕިޓަލް ލަންޑަނުގައި ހުންނަ ބެލްމާޝް ޖަލުގައެވެ.

"އަސާންޖް ޖަލުން ދޫކޮށްލައިފިނަމަ، ކުރިޔަށް ހުރި އިސްތިއުނާފީ ޝަރީއަތްތަކަށް އޭނާ ހާޒިރު ނުވެދާނެ ކަމަށް ބަގޫލުކުރެވޭވަރަށް ހެކި ހުރިކަމަށް އަހަރެން ގަބޫލުކުރަން،" ޑިސްޓްރިކްޓް ކޯޓުގެ ފަޑިޔާރު ބަރައިސްޓަރ ވިދާޅުވިއެވެ.

ކޯޓުގެ މިނިންމުމަކީ، ފާއިތުވެދިޔަ ހަފްތާގައި އެމެރިކާއާއި އަސާންޖު ހަވާލު ކުރުމާ ދެކޮޅަށް ކޯޓުން ނިންމި ނިންމުންތަކާއިއެކު އުފާ ފާޅުކުރަމުން ދިޔަ، އަސާންޖުގެ ގާނޫނީ ވަކީލުންގެ ޓީމަށް ލިބިގެންދިޔަ ވަރަށްބޮޑު ނާކާމިޔާބީއެކެވެ. ވިކިލީކްސްއިން ބުނެފައިވަނީ، ކަފާލާތުގެ ދަށުން އަސާންޖެ ދޫނުކުރުމަށް ކޯޓުން ނިންމި ނިންމުން އިސްތިއުނާފް ކުރުމަށް މިހާރު އެކުންފުނިން ތައްޔާރު ވަމުން ދާކަމަށެވެ.

އަސާންޖްގެ ސިއްޙީ ހާލަތަށް ރިއާޔަތް ކުރުމަށްފަހު، އޭނާގެ ނަފްސާނީ މައްސަލަތަށް ހުރި ނިސްބަތުން، އެމެރިކާއާއި ހަވާލުކުރުމަކީ، އަނިޔާވެރިކަމަކަށް ވާނެކަމަށް ގަބޫލު ކުރެވޭތީވެ، ފާއިތުވެދިޔަ ހަފްތާގައި، އިގިރޭސިވިލާތުގެ ކޯޓުން ވަނީ އަސާންޖް އެމެރިކާއާއި ހަވާލުކުރެވެން ނެތްކަމަށް ބުނެފައެވެ.

އަސާންޖް އެމެރިކާއާއި ހަވާލުކުރުމަށް މައްސަލައިގެ ހުކުމް އިއްވަމުން ފަޑިޔާރު ބަރައިސްޓަރ ވިދާޅުވެފައި ވަނީ، "އޭނާއަކީ، ވަރަށް ބޮޑަށް މާޔޫސްވެފައި ހުރި، އަދި ބައެއް ހާލަތްތަކުގައި، ގޮތް ހުސްވެފައި ހުރި މީހެއް،" ކަމުގައެވެ. "އަދި އޭނާ އަމިއްލައަށް ދަންޖެހި މަރުވެގެން ދިޔަ ނުދެވޭނެ ގޮތް ހެދުމަށްޓަކާ، އޭނާ ބަންދު ކޮށްފައި ބަހަޓާ ޖަލުން އަޅާ ފިޔަވަޅުތައްވެސް މުގުރާލުމުގެ ވިސްނުމާއި ޝައުގު އޭނާގެ ކިބައިގައި ވަރަށް ބޮޑަށް އެބަހުރި،" ފަޑިޔާރު ވިދާޅުވެފައި ވެއެވެ.

މިހުކުމް އިއްވަމުން، ފަޑިޔާރު ބަރައިސްޓަރ ވިދާޅުވަނީ، އޭނާގެ މައްޗަށް ތުހުމަތު ކުރެވިފައިވާ، ގާނޫނުތައް މުގުރާމާއި ޖާސޫސް ކުރުމާއި އަދި، ސަރުކާރުގެ ކޮންޕިއުޓަރ ސިސްޓަމްތައް ހެކްކުރަ އުޅުނު ކަމުގެ ތަފާތު 18 ދައުވާއަކާ ކުރިމަތިލުމަށް، އެޓްލާންޓިކް ކަޑު ހުރަސްކޮށް އޭނާ ފޮނުވާލައިފިނަމަ، އޭނާ އަމިއްލައަށް ދަންޖެހުމުގެ ފުރުސަތު ވަރަށް ބޮޑުކަމުގައެވެ.

އޮސްޓްރޭލިއާގެ ރައްޔިތެއް ކަމުގައިބާ، އަސާންޖް، 49، ހައްޔަރު ކުރެވިިފައިވަނީ، އިގިރޭސިވިލާތުގައި ހުންނަ އެކުއަޑޯރިއަން އެމްބަސީގައި ހިމާޔަތް ހޯއްދަވައިގެން ހުންނަވާތާ އެތަކެއް އަހަރެއް ވެގެން ގޮސްފައި ވަނިކޮށެވެ. އޭނާ ހައްޔަރު ކޮށްފައިވަނީ، އެނާގެ މައްޗަށް ކުރެވުނު ސްވިޑްއާ ގުޅުންހުރި އެހެން ދައުވާގެއަގައި، ކަފާލާތުގެ ދަށުން ދޫކޮށްލާފައި ވަނިކޮށް، ކަފާލާތުގެ އުސޫލުތަކާއި ޚިލފްވެގެންނެވެ.

އަދި މީގެިތުރުން، އަސާންޖްގެ ޖިސްމާނީ އަދި ނަފްސާލީ ހާލަތާ ގުޅޭގޮތުންވެސް މިހާރުވަނީ ބޮޑެތި ކަންބޮޑުވުންތަކެއް އުފެދިފައެވެ.

މިހަފްތާގެ ހޯމަދުވަހު، އެމެރިކާއާއި އަސާންޖު ހަވާލު ނުކުރުމަށް ނިންމާ ފަޑިޔާރު ކުރެއްވި ހުކުމުގައި ބުނެފައިވަނީ، ކޯޓުގައި ހުރެގެން، އަސާންޖް، އާދަޔާ ޚިލާފަށް ގިނައިން ސަމަރިޓަން ނަމަކަށް ކިޔާ ކުންފުންޏަކަށް ގުޅާފައިވާ ކަމުގައެވެ. މިކުންފުންޏަކީ، އަމިއްލައަށް ދަންޖެހުމުން ސަލާމަތް ކޮށްދިނުމަށް ހިލޭ ސާބަހަށް މަސައްކަތްކުރާ ޖަމިއްޔާއެކެވެ.

އަސާންޖައާއި އޭނާ ހިންގަމުން އައި ވެބްސައިޓް ވިކިލީކްސް އެންމެ ފުތަމަ އާންމު ވެގެންއައީ، އެމެރިކާގެ އެޕާޗޭ ހެލިކޮޕްޓަރަކުން ހަމަލާދީ، އިރާގުގެ އެތަކެއް ސިފައިނާ އަދި ރޮއިޓާސްގެ ދެ ނޫސްވެރިޔަކު މަރާލާ،39 މިނިޓްގެ ވީޑިއޯއެއް އާންމު ކުރި ހިސާބުންނެވެ.