މޯލްޑިވްސް ސައިކްލިންގ ކުލަބުގެ ރައީސްގެ މަގާމަށް އަޙްމަދު ވަޙީދު (ވައްޑެ) އިންތިޚާބު ކޮށްފިއެވެ.
ހޮނިހިރު ދުވަހު ބޭއްވި އެ ކުލަބުގެ ހިންގާ ކޮމިޓީގެ އިންތިޚާބުގައި ވޯޓުލުމުގެ ހައްގު 48 މެންބަރުންނަށް ލިބިގެންދިޔަ ނަމަވެސް، ވޯޓު ލާފައިވަނީ 27 މީހުންނެވެ.
މި އިންތިޚާބުގައި ރައީސް ކަމަށް ވައްޑޭ އެކަނި ކުރިމަތިލެއްވިއިރު، އޭނާ ހޮވިވަޑައިގަތީ ފެންނަ ނުފެންނަ ކަމަށް ނެގި ވޯޓުގައި 26 މީހުންގެ ވޯޓާއެކުއެވެ. ނުފެންނަ ކަމަށް ވޯޓު ދިނީ އެންމެ މީހެކެވެ.
މޯލްޑިވްސް ސައިކްލިންގ ކުލަބުގެ ނައިބު ރައީސް ކަމަށް ތިން ބޭފުޅަކު ހޮވަން ގަވާއިދުގައި ހިމަނާފައިވާއިރު، މަގާމަށް ކުރިމަތިލެއްވި ތިން ބޭފުޅުންވެސް ވަނީ އިންތިޚާބުވެވަޑައިގެންފައެވެ. އެގޮތުން ނައިބު ރައީސްގެ މަގާމަށް ހޮވިވަޑައިގަތް ތިން ބޭފުޅުންނަކީ މުޙައްމަދު އާދަމް، އަބްދުﷲ ފިރުޝާން އަދި އިބްރާހިމް ޝަމީމެވެ.
ހަޒާންދާރުގެ މަގާމަށް ކުރިމަތިލެއްވީ އެންމެ ބޭފުޅެކެވެ. މި މަގާމަށް ކުރިމަތިލެއްވި ހުސެއިން ސަމީރަށް ވަނީ 26 ވޯޓު ލިބިވަޑައިގެންފައެވެ. އަދި ހިންގާ ކޮމިޓީގެ މެންބަރު ކަމަށް ހޮވިފައިވާ ތިން ބޭފުޅުންނަކީ މުޙައްމަދު ޝުޖާއު، އިބްރާހީމް އިމްރާން އަދި ހުސެއިން ޝަރީފެވެ.
