"ބިގްބޮސް14″ ގައި އާދިއްތަ ދުވަހުގެ އެޕިސޯޑުގައި މަޝްހޫރު އެކްޓުރެސް އަދި މޮޑެލް ސަނީ ލިއޯން މެހެމާނެއްގޮތުގައި ބިގްބޮސްގެ ގެއިން ފެނިގެންދިޔައެވެ. ހަމައެއާއެކު އީޖާޒް ހާން އެނާގެ ހިތުގައި ޕަވިތްރާ ޕޫނިއާއަށް އޮތް ލޯބި ބުނެދީ، އަލީ ގޯނީ ޖޭސްމިން ބާސިންއަށް ކައިވެންޏަށް ޕްރޮޕޯސްކުރާތަންވެސް ފެނިގެންދިޔައެވެ.
ހޯސްޓު ސަލްމާން ޚާން، ސަނީ ލިއޯންއަށް ޝޯވއަށް މަރުހަބާ ކިޔުމަށްފަހު އޭނާ ފެނިގެންދިޔައީ ބިގްބޮސްގެ ގޭތެރެއިންނެވެ. އެންމެންނަށް އާ އަހަރުގެ ތަހުނިޔާ ކިޔުމަށްފަހު ޑަކްޓަރަކަށްވެގެން ފަހަރަކު ބައިވެރިއެއްގެ ޗެކްއަޕް ސަނީ ހަދަން ފަށައެވެ.
ފުރަތަމަ އީޖާޒް ޚާން ދިއުމުން އޭނާގެ ވިންދު ބަލައި ސަނީ މަޖަލަކަށް ބުނަނީ އޭނާއަށް އިވުނީ ޕަވިތުރާ، ޕަވިތުރާ، ކިޔާ އަޑުކަމަށެވެ. އަދި ހިތުގެ މައްސަލައެއް އެބަހުރިކަމަށާއި އީސީޖީ ހަދަންޖެހޭ ކަމަށްވެސް ސަނީ ބުނެއެވެ.
އަދި އީސީޖީ ހަދައި ދެއްކުމުން އޭގައިވެސް ހުރީ ޕަވިތުރާގެ ނަމެވެ. އީޖާޒް ބުނެފައިވަނީ އެއީ ތެދުކަމަށާއި ޕަވިތްރާގެ މަތިން ވަރަށް މިސްވާކަމަށެވެ. ފަރުވާއެއްގެ ގޮތުން ސަނީ އީޖާޒް ކައިރީ ޕަވިތުރާއަށް ލޯބިވާކަން ބުނެދިނުމަށް ބުނުމުން އީޖާޒް އޭނާގެ އިހުސާސްތައް ކިޔައިދޭތަން ފެނިގެންދެއެވެ.
އެއަށްފަހު އަލީ ގޯނީ ގެނައުމަށްފަހު، ޖޭސްމިން ލޯބިވާކަމަށް ބުންޏަސް އަލީ ނުބުނާކަމަށްބުނެ އޭނާއަށް ޕްރޮޕޯސްކުރަން ޖައްސައެވެ. އަލީ ރަތްކުލައިގެ ހިތެއް ހިފައިގެން ކައިވެންޏަށް އެދުމުން ޖޭސްމިން އުފަލުން ބުނެފައިވަނީ މައިންބަފައިން ޤަބޫލުވެއްޖެއްޔާ ހަމަގައިމުވެސް ކައިވެނިކުރާނީ އަލީ އާ ކަމަށެވެ.
ޕަވިތުރާ އާއި އީޖާޒް ދިމާވީ "ބިގްބޮސް14″ އިންނެވެ. ޕަވިތްރާ އަބަދުވެސް އޭނާގެ އިހުސާސްތައް ބުނެދިން ނަމަވެސް އީޖާޒް މީގެކުރިން އޭނާގެ އިހުސާސްތަކާއިމެދު އެހާ ޔަޤީނެއް ނޫނެވެ.
