އެމްޑީޕީގައި ފެކްޝަން އުފެދޭ ވާހަކަ ދައްކަނީ ޕާޓީ ވަރުގަދަވާތީ "ގުޑުގުޑު އަޅާ" ބަޔަކު: ޝާހިދު

އެމްޑީޕީގެ އެތެރޭގައި ފެކްޝަންތައް އުފެދޭނެ ކަމަށް ދައްކާ ވާހަކަތަކަކީ، ޕާޓީ ވަރުގަދަވަމުންދާ މަންޒަރު ފެނުމުން "ގުޑުގުޑު އަޅާ" ބޭފުޅުން ދައްކާ ވާހަކަތަކެއް ކަމަށް އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.

މިއަދު ބޭއްވުނު ނޫސްވެރިންގެ ބައްދަލުވުމުގައި ޝާހިދު ވިދާޅުވީ، އެމްޑީޕީގެ އުސޫލުތައް ހަރުދަނާވެ، ޕާޓީ ކުރިއަރަމުންދާ ތަން ފެންނާތީ، ބައެއް ފަރާތްތަކުން އެފަދަ ވާހަކަތައް ދައްކަމުންދާ ކަމަށެވެ. "ހެދޭ ކުރިއެއްގައި ހުންނާނެ ކުދިކުދި ފަތްތަކާއި ކުރިތައް ފަޅައިގެން ދާނެ" ކަމަށް އޭނާ ވިދާޅުވިއެވެ.

އެމްޑީޕީގެ ކުރީގެ ރައީސް މުހައްމަދު ނަޝީދު އެ ޕާޓީއާ އަލުން ގުޅިވަޑައިގަތުން ފާހަގަކުރުމަށް މިދިޔަ ހޯމަ ދުވަހުގެ ރޭ ބޭއްވި ޖަލްސާއަށް، ކުރީގެ ރައީސް އިބްރާހީމް މުހައްމަދު ޞާލިޙާއި އޭނާގެ ސަޕޯޓަރުން ބައިވެރިނުވުމާ ގުޅިގެން، ޕާޓީގައި ދެ ފެކްޝަނެއް އުފެދޭނެ ކަމުގެ ވާހަކަތައް ފެތުރެމުންދާ ދަނޑިވަޅެއްގައި، ޝާހިދު މި ވާހަކަތައް ދޮގުކުރެއްވިއެވެ.

އެމްޑީޕީގެ ޗެއާޕާސަން ފައްޔާޒު އިސްމާއިލް ވެސް ވިދާޅުވީ، ފެކްޝަންތަކުގެ ވާހަކަތަކަކީ އެއްވެސް އަސާސެއް ނެތް ވާހަކަތަކެއް ކަމަށެވެ. އޭނާ ވިދާޅުވީ، އޭނާ އަކީ ވެސް ރައީސް ޞާލިޙަށް ތާއީދުކުރާ ބޭފުޅެއް ކަމަށާއި، ނަމަވެސް ނަޝީދުގެ ޖަލްސާގައި ބައިވެރިވި ކަމަށެވެ.

ޞާލިޙް ޖަލްސާއަށް ވަޑައިނުގަތީ، ފަރުވާއަށް ރާއްޖެއިން ބޭރުގައި ހުންނެވުމުން ކަމަށް ފައްޔާޒު ވިދާޅުވިއެވެ. އަދި ނަޝީދު ވެސް މިއަދު އަނެއްކާ ރާއްޖެއިން ބޭރަށް ފުރާވަޑައިގަންނަވާނެ ކަމަށް އޭނާ ވިދާޅުވިއެވެ.

ޝާހިދު ވިދާޅުވީ، އެމްޑީޕީގެ 20 ވަނަ އަހަރީ ދުވަސް ފާހަގަކުރަމުންދާއިރު، ޕާޓީގައި ބައިވަރު ލީޑަރުން ތިއްބެވުމާއި، ރައްޔިތުންގެ އިތުބާރު އެމްޑީޕީއަށް ލިބެމުންދާކަން ފެނުމަކީ އުފަލެއް ކަމުގައެވެ. އޭނާ ވިދާޅުވީ، އެމްޑީޕީ މިހާރު ފެންނަނީ "ހެދޭ ކުރިއެއްގެ" ގޮތުގައި ކަމަށެވެ.

ނަޝީދާއި ދަ ޑިމޮކްރެޓްސް އަލުން އެމްޑީޕީއާ ގުޅުމަށް މިދިޔަ އަންގާރަ ދުވަހު ގަރާރެއް ފާސްކުރުމަށްފަހު، އެކަން ރަސްމީކޮށް ފާހަގަކުރުމަށް ރޭ ސަލްޓަން ޕާކުގައި ހަފުލާ ބޭއްވުނެވެ. ޞާލިޙް ސޯޝަލް މީޑިއާގައި މަރުހަބާ ވިދާޅުވި ނަމަވެސް، ޖަލްސާއަށް ވަޑައެއް ނުގަންނަވައެވެ.

ނަޝީދު އެމްޑީޕީން ވަކިވެވަޑައިގަތީ 2022 ވަނަ އަހަރު، ޞާލިޙާ ވާދަކުރައްވައި ރިޔާސީ ޕްރައިމަރީން ބަލިވެވަޑައިގަތުމަށްފަހުގައެވެ. މިހާރު އަލުން އެ ޕާޓީއާ ގުޅިވަޑައިގަތުމާއެކު، ދެ ބޭފުޅުންގެ މެދުގައި އަލުން ވާދަވެރިކަން އުފެދިދާނެ ކަމަށް ސިޔާސީ މާހިރުން ލަފާ ކުރެއެވެ.