އީރާނުން ނިއުކްލިއަރ ހަތިޔާރު އުފެއްދުމުގެ ހެއްކެއް ނެތްކަމަށް ޑިރެކްޓަރ އޮފް ނެޝަނަލް އިންޓެލިޖެންސް ޓަލްސީ ގަބާޑް ދެއްކި ވާހަކަތަކަކީ އޮޅުވާލުމެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުން ޓްރަމްޕް ވިދާޅުވީ "އާނ، އަހަރެންގެ އިންޓެލިޖެންސް ކޮމިއުނިޓީ ވަނީ އޮޅުވާލާފައި" ކަމަށެވެ. އީރާނުގެ ނިއުކްލިއަރ ޕްރޮގްރާމް ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޓްރަމްޕް ވިދާޅުވިއެވެ.
އީރާނާއި އިސްރާއީލާ ދެމެދު ކުރިއަށްދާ ހަނގުރާމަ ނިމުމަކަށް ގެނައުމަށް ކުރެވޭ އެއްބަސްވުމަކަށް "ފަހަރެއްގައި" ތާއީދު ކުރައްވާނެކަމަށް ވެސް ޓްރަމްޕް ވިދާޅުވިއެވެ. އޭނާ ފާހަގަކުރެއްވީ "ހަނގުރާމައިގެ ގޮތުން އިސްރާއީލް ދަނީ ކާމިޔާބީއާ ދިމާއަށް ކުރިއަރަމުން، އެހެންނަމަވެސް އީރާނު ދަނީ އެހާ ކާމިޔާބު މަގެއްގައި ނޫންކަން ކޮންމެ މީހަކަށްވެސް ފާހަގަކުރެވޭނެ" ކަމަށެވެ.
އޭޕްރީލް މަހު ނެޝަނަލް އިންޓެލިޖެންސް ޗީފް ވަނީ އީރާނުން ނިއުކްލިއަރ ހަތިޔާރު އުފައްދަމުން ނުދާކަމުގެ މަޢުލޫމާތު ރައީސް ޓްރަމްޕްއަށް ހިއްސާކޮށްފައެވެ. އެކަމަކު ޓްރަމްޕް ވަނީ މި މަޢުލޫމާތު ޤަބޫލުނުކުރައްވާ ދޫކޮށްލައްވާފައެވެ.
އަލް ޖަޒީރާގެ ސީނިއަރ ޕޮލިޓިކަލް އެނަލިސްޓް މަރުވާން ބިޝާރާ ވިދާޅުވި ގޮތުގައި، ޓަލްސީ ގަބާޑް ހުށަހަޅުއްވާ މަޢުލޫމާތަކީ އޭނާގެ އަމިއްލަ ފިކުރެއް ނޫނެވެ. "އޭނާ ތަމްސީލުކުރައްވަނީ ހުރިހާ އިންޓެލިޖެންސް އޭޖެންސީތަކެއްގެ އެއްބަސްވުމެވެ" ބިޝާރާ ވިދާޅުވިއެވެ.
ބިޝާރާ އިތުރަށް ވިދާޅުވީ "މި އިންޓެލިޖެންސްއަކީ އިތުބާރުހުރި މަޢުލޫމާތަކަށް ވާންޖެހެއެވެ. މިއީ ވަކި ފަރުދެއް ނުވަތަ ވަކި ޓީމެއްގެ ނިންމުމެއް ނޫނެވެ. މިއީ އެމެރިކާގެ މުޅި އިންޓެލިޖެންސް ކޮމިއުނިޓީގެ އެއްބަސްވުމެކެވެ" ކަމަށެވެ.
ރައީސް ޓްރަމްޕް މިފަދަ މުހިންމު މަޢުލޫމާތެއް ޤަބޫލުނުކުރައްވާ، އިސްރާއީލުގެ ޕްރައިމް މިނިސްޓަރ ބެންޖަމިން ނެތަންޔާހޫ ފަދަ ފަރާތެއްގެ ވާހަކަތަކަށް އިސްކަންދެއްވުމަކީ ކަންބޮޑުވާންޖެހޭ ކަމެއްކަމަށް ބިޝާރާ ފާހަގަކުރެއްވިއެވެ. ޚާއްޞަކޮށް ނެތަންޔާހޫއަކީ ޣައްޒާގައި ހިންގި ޢަމަލުތަކާ ގުޅިގެން ބައިނަލްއަޤްވާމީ ޤާނޫނީ ދަޢުވާތައް އުފުލިފައިވާ ފަރާތެއްކަން އޭނާ ހަނދާންކޮށްދެއްވިއެވެ.
ކޮމެންޓު ފޮނުވާ