މަސްތުވާތަކެތީގެ ވިޔަފާރީގައި ހަރަކާތްތެރިވާކަމުގެ ތުހުމަތުގައި ހުޅުމާލެއިން 60 އަހަރުގެ ފިރިހެނަކު ފުލުހުން ހައްޔަރުކޮށްފިއެވެ. މިދިޔަ ހުކުރު ދުވަހު ހުޅުމާލެ ފުރަތަމަ ފިޔަވަހީގެ 10 ނަންބަރު ފްލެޓް ކައިރިން ހައްޔަރުކުރީ ހ. މެޑޯސްވީޓް، އަޙްމަދު ޢަފީފް (60 އަހަރު) އެވެ.
ދިވެހި ފުލުހުންގެ ޚިދުމަތުން މައުލޫމާތު ދެއްވި ގޮތުގައި، ސަރަހައްދުގައި ޝައްކުކުރެވޭ ހަރަކާތްތަކެއް ހިންގަމުންދާތީ، އަޙްމަދު ޢަފީފަށް މަޑުކުރުމަށް އެންގުމުން އޭނާގެ އަތުން އެއްޗެއް ވައްޓާލާފައި ވެއެވެ. މި މަންޒަރު ފުލުހުންނަށް ފެނުމާއެކު އޭނާ ހުއްޓުވައި، އޭނާ ހުރިތަން ބަލައި ފާސްކުރިއެވެ.
ފާސްކުރުމުން އޭނާ ވައްޓާލި ތަނުން މަސްތުވާތަކެތިކަމަށް ޝައްކުކުރެވޭ އެއްޗެހި ހުރި 5 ރަބަރު ޕެކެޓް ފުލުހުންނަށް ފެނިފައިވެއެވެ. މި ޕެކެޓްތަކުގައި ހުރި މާއްދާތަކަކީ މަސްތުވާތަކެއްޗެއްތޯ ބެލުމަށް ފުލުހުން ތަޙުލީލުކުރަމުން ގެންދާކަމަށް މައުލޫމާތު ލިބެއެވެ.
މި މައްސަލައާ ގުޅިގެން އަޙްމަދު ޢަފީފް ކްރިމިނަލް ކޯޓަށް ހާޒިރުކުރުމުން، ބަންދާމެދު ގޮތެއް ނިންމުމަށް ބެއްލެވި ފަނޑިޔާރު ވަނީ އޭނާ 10 ދުވަހަށް ބަންދުކުރުމަށް އަމުރުކުރައްވާފައެވެ.
މަސްތުވާތަކެތީގެ ބޮޑު މައްސަލައެއްކަމަށް ބެލެވޭ މި މައްސަލައިގައި އިތުރު މީހުން ޝާމިލުވެފައިވޭތޯ ބެލުމަށާއި، މި ޕެކެޓްތައް ގެނައި މަގާއި، ވިއްކާލަން ގަސްތުކުރި ފަރާތްތައް ހޯދުމަށް ފުލުހުން އިތުރު ތަޙުގީގުތައް ކުރިއަށް ގެންދާކަމަށް ވިދާޅުވިއެވެ.
ކޮމެންޓު ފޮނުވާ