ރާއްޖޭގެ ބޭރު ފައިސާގެ ރިޒާވް މިހާރު ރަނގަޅު ހާލަތެއްގައި އޮތީ އިންޑިއާއާއެކު ވެވިފައިވާ ކަރަންސީ ސްވޮޕް އެއްބަސްވުމުގެ ސަބަބުން ކަމަށް އިންޑިއާގެ ހައިކޮމިޝަނުން ބުނެފިއެވެ.
އިންޑިއަން ހައިކޮމިޝަނުން އެކްސް (ކުރީގެ ޓްވިޓަރ) ގައި ކުރި ޕޯސްޓެއްގައި ފާހަގަކޮށްފައިވާ ގޮތުގައި، 2024 ވަނަ އަހަރުގެ އޮކްޓޯބަރު މަހު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ރިޒާވް ބޭންކް އޮފް އިންޑިއާ (އާރްބީއައި) އާ ދެމެދު 400 މިލިއަން އެމެރިކާ ޑޮލަރުގެ ކަރަންސީ ސްވޮޕް އެއްބަސްވުމެއް ވެވިފައިވެއެވެ. މި އެއްބަސްވުމަކީ ރާއްޖޭގެ ބޭރު ފައިސާގެ ރިޒާވް ހަރުދަނާވުމުގައި ކީ ރޯލެއް އަދާކުރި ކަމެއް ކަމަށް އިންޑިއާއިން ބުނެއެވެ.
މި އެއްބަސްވުމުގެ ދަށުން އެމްއެމްއޭއަށް ދެ ވަކި ކަރަންސީ ވިންޑޯ މެދުވެރިކޮށް ސްވޮޕް ނެގޭނެއެވެ. އެގޮތުން އެމެރިކާ ޑޮލަރު/ޔޫރޯ ވިންޑޯއާއި އިންޑިއަން ރުޕީ ވިންޑޯ ބޭނުންކުރެވޭނެއެވެ. މި ފެސިލިޓީގެ ދަށުން އެމްއެމްއޭއަށް ޖުމްލަ 400 މިލިއަން އެމެރިކާ ޑޮލަރުގެ އިތުރުން 30 ބިލިއަން އިންޑިއަން ރުޕީސް ހަމައަށް އެކި ފަހަރު މަތިން ސްވޮޕް ނެގުމުގެ ފުރުސަތު ލިބިގެންދާނެއެވެ.
ރާއްޖޭގެ އިޤްތިޞާދީ ހާލަތު ރަނގަޅުވަމުންދާ ކަމުގެ އިތުރު ހެކިތައް މިހާރު ފެންނަމުންދެއެވެ. 2025 ވަނަ އަހަރުގެ ޖޫން 5 ވަނަ ދުވަހުގެ ނިޔަލަށް ރާއްޖެއިން 71 މިލިއަން ޑޮލަރުގެ ފިސްކަލް ސަރޕްލަސްއެއް ރެކޯޑުކޮށްފައިވެއެވެ. މިކަން މިހެން ވެފައިވަނީ ދައުލަތުގެ އާމްދަނީ އިތުރުވުމާއި، ސަރުކާރުން އަމަލުކުރަމުންދާ ހަރުދަނާ ބަޖެޓް ކޮންޓްރޯލް ސިޔާސަތުތަކުގެ ސަބަބުންނެވެ.
ފިޗް ރޭޓިންގްސްއިން ރާއްޖޭގެ ސޮވްރިން ކްރެޑިޓް ރޭޓިން 'ސީސީ' ގައި ދަމަހައްޓާފައި އޮތް ނަމަވެސް، ސަރުކާރުގެ މާލީ ކަންކަން ބެލެހެއްޓުމުގައި ގެނެވިފައިވާ ބަދަލުތަކުން ރަނގަޅު ނަތީޖާތައް ފެންނަމުންދެއެވެ. މި ގޮތުން ޒިންމާދާރު މާލީ ސިޔާސަތުތަކާއި ދައުލަތުގެ މާލިއްޔަތު ބެލެހެއްޓުމުގައި ހަރުދަނާކަން އިތުރުވެފައިވާ ކަން ފާހަގަކުރެވެއެވެ.
ސަރުކާރުން މިހާރު މަސައްކަތް ކުރަމުންދަނީ މެދުރާސްތާގެ މާލީ އަދި ދަރަނީގެ ހަރުދަނާ ސްޓްރެޓެޖީތަކެއް އެކުލަވާލުމަށެވެ. މި މަސައްކަތުގެ ބޭނުމަކީ އިޤްތިޞާދީ އުފެއްދުންތެރިކަން އިތުރުކޮށް، އިންވެސްޓްމަންޓަށް ރަނގަޅު މާހައުލެއް ޤާއިމުކޮށް، ސްޓްރަކްޗަރަލް އިޞްލާޙުތައް ގެނައުމުގެ ޒަރީއާއިން ދައުލަތުގެ ދަރަނި ކުޑަކުރުމެވެ.
ކޮމެންޓު ފޮނުވާ