ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ޚާއްޞަ މުޝީރު، ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު ވިދާޅުވެފައިވަނީ، ރިޔާސީ އިންތިޚާބުގައި ވާދަކުރުމުގެ އެއްވެސް ވިސްނުމެއް ނެތް ކަމަށެވެ. އެސް.އެސް.ޓީވީގެ ޕްރޮގްރާމެއްގައި ވާހަކަފުޅު ދައްކަވަމުން އޭނާ ވިދާޅުވީ، ސިޔާސީ ވެރިކަމަށް ކުރިމަތިލުމުގެ ދައުރު ނިމިއްޖެ ކަމަށެވެ.
މިދިޔަ މަހުގެ 26 ގައި ރައީސް މުއިއްޒުގެ ޚާއްޞަ މުޝީރުގެ މަޤާމަށް ޢައްޔަންކުރެވުނު ޑރ. ވަޙީދު ފާހަގަކުރެއްވީ، މި މަޤާމު ލިބުމަކީ ބޮޑު ޝަރަފެއް ކަމަށެވެ. ރައީސް މުއިއްޒު މި ފުރުޞަތު ދެއްވީ، އޭނާއާ ދޭތެރޭ އިތުބާރު ކުރައްވާތީ ކަމަށް ޑރ. ވަޙީދު ވިދާޅުވިއެވެ.
"މިހާރު އަޅުގަނޑު ކުރާ މަސައްކަތުގައި ސިޔާސީ ވިސްނުމެއް ނެތް. އަޅުގަނޑުގެ އުއްމީދަކީ ކުރިއަށް އޮތް ސަރުކާރުތަކަށް ވެދެވޭ އެންމެ ރަނގަޅު އެހީތެރިކަމެއް ފޯރުކޮށްދިނުން. ރައްޔިތުންނާއި ޤައުމަށް އަޅުގަނޑަށް ކުރެވެން އޮތް އެންމެ ރަނގަޅު ޚިދުމަތް ކުރުމަށް މަސައްކަތް ކުރާނަން،" ޑރ. ވަޙީދު ވިދާޅުވިއެވެ.
ޑރ. ވަޙީދު ޙަސަން މަނިކަކީ، ދިވެހިރާއްޖޭގައި ޕީއެޗްޑީ ޑިގްރީ ހާސިލްކުރި ފުރަތަމަ ދިވެހި ބޭފުޅާއެވެ. ކުރީގެ ރައީސް މައުމޫން ޢަބްދުލްޤައްޔޫމްގެ ވެރިކަމުގައި ޚާރިޖީ ވުޒާރާގައި ދިގު މުއްދަތަކަށް ޚިދުމަތް ކުރެއްވި ބޭފުޅެކެވެ.
2008 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ކެންޑިޑޭޓް މުޙައްމަދު ނަޝީދުގެ ރަނިންމޭޓެއްގެ ގޮތުގައި ސިޔާސީ މައިދާނަށް ނިކުމެވަޑައިގެންނެވި ޑރ. ވަޙީދު، ނައިބު ރައީސްކަމުން ރައީސްކަމަށް ވަޑައިގަތީ 2012 ފެބުރުވަރީ މަހު ރައީސް ނަޝީދު އިސްތިޢުފާ ދެއްވުމާ ގުޅިގެންނެވެ. 2013 ވަނަ އަހަރުގެ ރިޔާސީ އިންތިޚާބުގައި ކުރިމަތިލެއްވި ނަމަވެސް، ފުރަތަމަ ބުރުގައި ފަހަތަށް ޖެހިވަޑައިގަތެވެ.
ކޮމެންޓު ފޮނުވާ