ޑިމޮކްރެސީގެ ދަތުރުގައި ރާއްޖެ ފަހަތަށް ނުޖެހުމަށްޓަކައި، ހަގީގަތް ހާމަކުރުމުގައި ނޫސްވެރިން ފަސްނުޖެހި ތިބުމަކީ ވަރަށް މުހިންމު ކަމެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެއެވެ.
މިއަދު ފާހަގަކުރާ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ، ޑިމޮކްރެޓިކް ހަމަތައް ދެމެހެއްޓުމުގައި ނޫސްވެރިން އަދާކުރާ މުހިންމު ދައުރު ވަރަށް ބޮޑުކަމަށެވެ.
ރާއްޖޭގެ ޑިމޮކްރެސީ ކުރިއަރަމުން އަންނަ ދަތުރުގައި މިހާތަނަށް ހޯދާފައިވާ ކުރިއެރުންތަކުން ފަހަތަށް ސޮއްސާލިދާނެކަމުގެ ބިރު އޮތް މިވަގުތު، ތެދު މަޢުލޫމާތު ހޯދައި ރައްޔިތުންނާ ހިއްސާކުރުމަށް ނޫސްވެރިން ހިތްވަރާއެކު މަސައްކަތް ކުރިއަށް ގެންދިއުން އެންމެ މުހިންމުކަމަށް އިބޫ ވިދާޅުވިއެވެ.
ނޫސްވެރިކަމުގެ މިނިވަންކަމުގެ ދުވަސް ފާހަގަކުރަނީ ކޮންމެ އަހަރެއްގެވެސް މެއި މަހުގެ 3 ވަނަ ދުވަހުއެވެ.
ގައުމުތަކުގެ ނޫސްވެރިކަމުގެ މިނިވަންކަން ދެނެގަތުމަށް "ރިޕޯޓާސް ވިތައުޓް ބޯޑާސް" (އާރްއެސްއެފް) އިން އެކުލަވާލާ "ވޯލްޑް ޕްރެސް ފްރީޑަމް އިންޑެކްސް" ގައި ރާއްޖެ ވަނީ މިދިޔަ އަހަރަށްވުރެ 2 ދަރަޖަ ކުރިއަށް ގޮސް 104 ވަނައަށް ޖެހިލާފައެވެ.
ނަމަވެސް ރާއްޖޭގެ ސްކޯއަށް ބޮޑު ކުރިއެރުމެއް ނާންނަ ކަމަށާއި، އަދިވެސް ރާއްޖެ އޮތީ ނޫސްވެރިކަން ކުރުމަށް އުނދަގޫ ގައުމުތަކުގެ ގިންތީގައި ކަމަށް އިންޑެކްސް އިން ދައްކައެވެ.
ކޮމެންޓު ފޮނުވާ