ސިޔާސީ ފިކުރަށް ބަލައި ވަޒީފާއިން ވަކިކުރުމުގެ ސަގާފަތެއް އަނެއްކާވެސް ފެށިއްޖެކަމަށް ކުރީގެ ރައީސް އިބްރާހިމް މުހައްމަދު ސާލިހް ވިދާޅުވެފައްޖެއެވެ. ރައީސް ސާލިހު މިފަދައިން ވިދާޅުވެފައިވަނީ އިދިކޮޅު އެމްޑީޕީގެ ހަރަކާތެއްގައި ބައިވެރިވުމާ ގުޅިގެން ވެމްކޯގެ ދެ މުވައްޒަފަކު ވަޒީފާއިން ވަކިކުރުމާ ގުޅިގެންނެވެ.
ކުރީގެ ރައީސް އިބްރާހިމް މުހައްމަދު ސާލިހް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، "އަނެއްކާވެސް ފެށިގެންމިދަނީ ތިމާ ނިސްބަތްވާ ސިޔާސީ ފިކުރުގެ ސަބަބުން ވަޒީފާގެ ޔަގީންކަން ގެއްލިގެން ދިއުމުގެ ސަގާފަތެއްގެ ފެށުން، މިކަން ހުއްޓާލުމަށް ސަރުކާރަށް ގޮވާލަން" ކަމަށެވެ. ސާލިހް ފާހަގަކުރައްވާފައިވާ ގޮތުގައި، ޤާނޫނު އަސާސީގެ ދަށުން ސިޔާސީ ޕާޓީތަކުގައި ބައިވެރިވެ ހަރަކާތްތެރިވުމަކީ ކޮންމެ ދިވެހި ރައްޔިތަކަށްވެސް ލިބިދީފައިވާ ހައްގެކެވެ.
މަޢުލޫމާތު ލިބިފައިވާ ގޮތުގައި، ވަޒީފާއިން ވަކިކޮށްފައިވަނީ ވެމްކޯގެ ހިތަދޫ ބްރާންޗުގެ މެނޭޖަރު މޫސާ މުހައްމަދާއި އެތަނުގެ އެހެން މުވައްޒަފެއްކަމަށްވާ މުހައްމަދު އަފްޒަލްއެވެ.
މިއާ ގުޅިގެން ސަރުކާރު ހިންގާ ޕީއެންސީގެ މެންބަރު، އައްޑޫ ހިތަދޫ މެދު ދާއިރާގެ މެންބަރު އަހްމަދު އަޒާންވެސް މި ދެ މުވައްޒަފުން ވަޒީފާއިން ވަކިކުރި ކުރުން ކުށްވެރިކުރައްވާފައިވެއެވެ.
ރައީސް ޑރ. މުހައްމަދު މުއިއްޒު ވަނީ ކުރިން އެކި ޕޯޑިއަމްތަކުގައި ސިޔާސީ ފިކުރަށް ބަލައި ތަފާތުނުކުރާނެކަމަށާއި، ވަޒީފާދީ، ވަކިނުކުރާނެކަމަށް ތަކުރާރުކޮށް ވިދާޅުވެފައެވެ. މިހާރު މުވައްޒަފުން ވަޒީފާއިން ވަކިކުރުމާ ގުޅިގެން، ގިނަ ބަޔަކު ސަރުކާރަށް ފާޑުކިޔަމުން ގެންދެއެވެ. އޭގެތެރޭގައި ސަރުކާރަށް ތާއީދުކުރާ ފަރާތްތައްވެސް ހިމެނެއެވެ.
ކޮމެންޓު ފޮނުވާ