މިފަހަރުގެ ރޯދަ ހަދިޔާގެ ގޮތުގައި ސަރުކާރުން 108،801 މަސްދަޅު ކޭސް ބެހި ކަމަށް ފިނޭންސް މިނިސްޓްރީން މިއަދު ހާމަކޮށްފިއެވެ. ރައީސް ޑރ. މުހައްމަދު މުއިއްޒުގެ ނިންމެވުމަކާ ގުޅިގެން މިދިޔަ ރޯދަމަހު މާލެއާއި އަތޮޅުތެރޭގެ ރަށްރަށުގައި ސަރުކާރުން ކޮންމެ ގެއަކަށް މަސްދަޅު ކޭހެއް ހަދިޔާކޮށްފައިވެއެވެ.
ބައެއް މީޑިއާތަކަށް މައުލޫމާތު ދެއްވަމުން ފިނޭންސް މިނިސްޓްރީގެ އޮފިޝަލަކު ވިދާޅުވެފައިވަނީ، މި މަސްދަޅު ކޭސްތައް ގަތުމަށް ދައުލަތުން 79.4 މިލިއަން ރުފިޔާ ހޭދަކޮށްފައިވާ ކަމަށެވެ. މިނިސްޓްރީން ފާހަގަކޮށްފައިވާ ގޮތުގައި ކޮންމެ މަސްދަޅު ކޭހަކަށް މިފްކޯއިން 30 ރުފިޔާގެ ޑިސްކައުންޓެއް ދީފައިވާއިރު، ސަރުކާރުން ކޮންމެ ކޭހަކަށް ޚަރަދުކޮށްފައިވަނީ 730 ރުފިޔާއެވެ.
މާލެ ސަރަހައްދުގައި މަސްދަޅު ކޭސްތައް ބެހުމުގެ މަސައްކަތް ދައުލަތުގެ ކުންފުނިތަކާއި ސިފައިންގެ އެހީތެރިކަމާއެކު ކުރިޔަށް ގެންދިޔަ ނަމަވެސް ރަށްރަށުގައި މަސްދަޅު ކޭސްތައް ބެހުމުގެ މަސައްކަތް ހަވާލުކޮށްފައިވަނީ ކައުންސިލްތަކާއެވެ.
