އެޑިއުކޭޝަން މިނިސްޓްރީން ވަނީ މިއަހަރުގެ ދިރާސީ އަހަރު ފެށުމުގެ ކުރިން ހުރިހާ ދަރިވަރުންނަށް ބޭނުންވާ ފޮތްތައް ލިބޭނެކަމަށް ކަށަވަރުކޮށްދީފައެވެ. މިނިސްޓްރީން މިހާރު ދަނީ ރާއްޖޭގެ ހުރިހާ ސްކޫލްތަކަށް ފޮތްތައް ފޮނުވުމުގެ މަސައްކަތް ކުރިއަށް ގެންދަމުންނެވެ.
މިނިސްޓްރީން މަޢުލޫމާތު ދެއްވިގޮތުގައި، ގްރޭޑް 4 އަދި 5 ގެ ފޮތްތައް ޙަވާލުކުރުމަށް މަންހަޖަށް ގެނެވުނު ބަދަލުތަކާ ގުޅިގެން ކުޑަ ލަސްކަމެއް އައިސްފައިވީ ނަމަވެސް، ދިރާސީ އަހަރު ފެށޭއިރު އެ ގްރޭޑްތަކުގެ ދަރިވަރުންނަށްވެސް ފޮތްތައް ލިބޭނެއެވެ.
އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ ޝިފާޒް މުޙައްމަދު ވިދާޅުވިގޮތުގައި، 2025 ވަނަ އަހަރުގެ ދިރާސީ އަހަރު ފެށޭނީ އޭޕްރީލް މަހުގެ 6 ވަނަ ދުވަހުއެވެ. މީގެއިތުރުން، ދިރާސީ އަހަރުގެ ބޮޑު ޗުއްޓީ ލިބޭނީ 2025 ވަނަ އަހަރުގެ ޑިސެމްބަރު 28 އިން 2026 ވަނަ އަހަރުގެ ޖެނުއަރީ 27 އަށެވެ.
އިސް ވެރިންގެ ފަރާތުން އިތުރަށް ހާމަކުރެއްވި ގޮތުގައި، 2026 ވަނަ އަހަރުން ފެށިގެން ދިރާސީ އަހަރުގެ މުޅި އުސޫލު ބަދަލުވެގެންދާނެއެވެ. ނަމަވެސް، މި ބަދަލާގުޅޭ އިތުރު ތަފްޞީލު އަދި ހާމަކުރައްވާފައެއް ނުވެއެވެ.
ކޮމެންޓު ފޮނުވާ