ފިނޭންސް މިނިސްޓްރީން ދައުލަތުގެ އާމްދަނީ އިތުރުކުރުމަށް އިތުރު 4.5 ބިލިއަން ރުފިޔާގެ ޓްރެޒަރީ ބިލް ވިއްކުމަށް ހުޅުވާލައިފިއެވެ. މި ޓީ-ބިލްތައް ވިއްކުމުގެ މައިގަނޑު މަޤްޞަދަކީ ދައުލަތުގެ ބަޖެޓަށް އާމްދަނީ ހޯދުމާއި އަދި އެތެރޭގެ މާލީ މާކެޓުގައި ހަރަކާތްތައް އިތުރުކުރުމެވެ.
މިފަހަރު ވިއްކަން ހުޅުވާލާފައިވާ ޓްރެޒަރީ ބިލްތަކުގައި ހިމެނެނީ ހަތަރު ތަފާތު މުއްދަތުގެ އޮޕްޝަންތަކެކެވެ:
- 28 ދުވަސް: 700 މިލިއަން ރުފިޔާ (3.50% އިންޓަރެސްޓް ރޭޓް)
- 98 ދުވަސް: 900 މިލިއަން ރުފިޔާ (3.87% އިންޓަރެސްޓް ރޭޓް)
- 182 ދުވަސް: 1 ބިލިއަން ރުފިޔާ (4.23% އިންޓަރެސްޓް ރޭޓް)
- 364 ދުވަސް: 1.8 ބިލިއަން ރުފިޔާ (4.60% އިންޓަރެސްޓް ރޭޓް)
ޓްރެޒަރީ ބިލަކީ ސަރުކާރުން ދޫކުރާ ކުރު މުއްދަތުގެ ދަރަނީގެ ވަސީލަތެކެވެ. މިއީ ޑިސްކައުންޓް ކުރެވިފައިވާ އަގެއްގައި ވިއްކުމަށްފަހު، މުއްދަތު ހަމަވުމުން މޫނުމަތީ އަގު އަދާކުރާ ގޮތަށް ނަގާ ފައިސާއެކެވެ. ޓީ-ބިލް ގަތުމުގައި ޢާންމުކޮށް ބައިވެރިވަނީ ވިޔަފާރި ބޭންކުތަކާއި، ސަރުކާރު ހިއްސާވާ ކުންފުނިތަކާއި، އިންވެސްޓްމަންޓް ފަންޑުތަކާއި، އަމިއްލަ ކުންފުނިތަކާއި އަދި ފަރުދުންނެވެ.
ފިނޭންސް މިނިސްޓްރީގެ ފަރާތުން ނެރުނު އެންމެ ފަހުގެ އިޢުލާނަށް ބަލާއިރު، ވޭތުވެދިޔަ ހަފުތާގައި 17 އެކި ފަރާތަކުން 2.1 ބިލިއަން ރުފިޔާގެ ޓީ-ބިލްގައި އިންވެސްޓްކޮށްފައިވެއެވެ.
މިދިޔަ އަހަރުގެ ޖުލައި މަހުގެ ނިޔަލަށް ރާއްޖޭގެ ޖުމްލަ ދަރަނި ވަނީ 139 ބިލިއަން ރުފިޔާއަށް އަރާފައެވެ. އަދި ދައުލަތުގެ ބަޖެޓުގައި އަންދާޒާކޮށްފައިވާ ގޮތުގައި މި އަހަރު ނިމޭއިރު ދައުލަތުގެ ދަރަނި 150 ބިލިއަން ރުފިޔާއަށް އަރާނެއެވެ.
