މަޝްހޫރު އެކްޓުރެސް އަނުޝްކާ ޝަރްމާގެ ބަނޑުބޮޑު އިރުގެ ފޮޓޯއެއް ފެންނަ ފުރަތަމަ މެގަޒިން ކަވަރ އެންމެންނަށް ދައްކާލައިފިއެވެ.
އަނުޝްކާ ވަނީ ބަނޑުބޮޑު އިރުގައި އެހީވި މީހުންގެ ވާހަކައާއި ދަރިފުޅަށް ނާސަރީއެއް ގޭގައި ތައްޔާރުކުރަނީކަމަށްވެސް ބުނެފައެވެ.
އަނުޝްކާ ވަނީ އޭނާގެ އިންސްޓަގްރާމުގައި މެގަޒިން ކަވަރގެ ފޮޓޯ ހިއްސާކޮށްފައެވެ. މި ފޮޓޯގައި އަނުޝްކާ ލައިގެން ހުރީ ބްރާލެޓްއަކާއި ފުޅާ ހަރުވާޅެކެވެ. އެއާއެކު ކުރީމް ކުލައިގެ ކޯޓެއްވެސް ލައިފައިވެއެވެ.
"ވޯގު މެގަޒިން" އަށް ދިން އިންޓަވިއުއެއްގައި އަނުޝްކާ ވަނީ ވިރާޓް ކޯލީ އާއި ދެމީހުން ވެގެން ބަނޑުބޮޑުކަން ފޮރުވި ވާހަކަ ހިއްސާކޮށްފައެވެ.
އަނުޝްކާ ބުނެފައިވަނީ ލޮކްޑައުންގައި ތިބުމުން ވިރާޓް ނޫން އެކަކަށްވެސް ބަނޑުބޮޑުކަމެއް ނޭނގޭނެކަމަށާއި ބޭރަށް ނިކުންނަނީ ހަމައެކަނި ޑަކްޓަރަށް ދެއްކުމަށްކަމުން އެކަކަށްވެސް އެމީހުން ނުފެންނާނެކަމަށެވެ.
އަދި ބަނޑުބޮޑުކަން އެނގުނު ތާ ކުރީކޮޅުގައި "ބުލްބުލް"ގެ ޕްރޮމޯޝަންއަށް ޒޫމް އިން ވީޑިއޯ ކޯލެއްގައި ތިއްބާ ހޮޑުލަވާގޮތް ވިކަމަށާއި އަވަހަށް ވީޑިއޯ އޮފްކޮށްލައި ވީޑިއޯ ކޯލްގައި އިން އޭނާގެ ބޭބެއަށް މެސެޖުކޮށް 10 މިނެޓު މަޑުކުރަން ބުނިކަމަށެވެ. އެދުވަހު ސެޓެއްގައި ހުރިނަމަ އެންމެންނަށް އެނގޭނެކަމަށްވެސް އަނުޝްކާ ވަނީ ބުނެފައެވެ.
މީގެ އިތުރުން އަނުޝްކާ ވަނީ ދަރިފުޅަށް ނާސަރީއެއް ތައްޔާރުކުރާކަމަށް ވެސް ބުނެފައެވެ. އަނުޝްކާ ބުނިގޮތުގައި ނާސަރީގައި ހުރިހާ ކުލައެއް ހުންނާނެކަމަށާއި ޖަނަވާރުންގެ ތީމްއަކަށް ތައްޔާރުކޮށްފައިވަނީ ވިރާޓަށާއި އޭނާއަށް ޖަނަވާރުން ކަމުދާތީ، ދަރިފުޅަށްވެސް ކަމުދާނެތީވެކަމަށެވެ. އަނުޝްކާ ބުނީ އޭނާ ދަރިފުޅު ތަރުބިއްޔަތު ކުރާނީ ވަރަށް ރަނގަޅަށްކަމަށެވެ.
View this post on Instagram
އަނުޝްކާ ވިހާނެ ކަމަށް ބެލެވެނީ ޖެނުއަރީގައިއެވެ. އަދި ވިހެއުމަށްފަހު މޭ މަހު މަސައްކަތަށް ނުކުންނާނެކަމަށް އަނުޝްކާ ވަނީ ބުނެފައެވެ.
