ފެނަކަ ކޯޕަރޭޝަނުން ނަގާފައިވާ މުދަލަށް ނުދައްކާ އޮތް 44 މިލިއަން ރުފިޔާ ދެއްކުމަށް ސިވިލް ކޯޓުން އަމުރުކޮށްފިއެވެ. މި މައްސަލަ ކޯޓަށް ހުށަހެޅީ ކްލެސިކޯ ލިމިޓެޑުންނެވެ.
ކްލެސިކޯއިން ހުށަހެޅި މައްސަލައިގައި، މުދަލަށް ދައްކަންޖެހޭ 44،014،801 ރުފިޔާގެ އިތުރުން، ފައިސާ ނުދެއްކުމުގެ ސަބަބުން ލިބުނު ގެއްލުމުގެ ބަދަލުގެ ގޮތުގައި 6.9 މިލިއަން ރުފިޔާ ހޯދުމަށް އެދުނެވެ. ނަމަވެސް މުދަލަށްވާ ފައިސާ ދެއްކުމަށް ފެނަކައިން އެއްބަސްވުމާ ގުޅިގެން، ކްލެސިކޯއިން ގެއްލުމުގެ ބަދަލު ހޯދުމަށް އެދުނު އެދުން އަނބުރާ ގެންދިޔައެވެ.
ޝަރީއަތުގެ މަޖިލީހުގައި ފެނަކައިން ވަނީ މިއީ ކްލެސިކޯއަށް ދައްކަންޖެހޭ ފައިސާއެއްކަން ޤަބޫލުކޮށް، އެ ފައިސާ ދެއްކުމަށް ދެފަރާތުން އެއްބަސްވެފައެވެ. މި އެއްބަސްވުމާ އެއްގޮތަށް، ކޮންމެ މަހަކު ތިން މިލިއަން ރުފިޔާގެ މަގުން 14 މަސްދުވަހުގެ ތެރޭގައި ފައިސާ ދެއްކުމަށާއި، 15 ވަނަ މަހު ދެ މިލިއަން ރުފިޔާ ދައްކާ ޚަލާސްކުރުމަށް ސިވިލް ކޯޓުން ވަނީ ޙުކުމްކޮށްފައެވެ.
އެހެންނަމަވެސް، ފެނަކައިން ނަގާފައިވަނީ ކޮން ބާވަތެއްގެ މުދަލެއްކަން ޙުކުމުން އެނގެން ނެތެވެ. ފާހަގަކޮށްލެވޭ ކަމަކީ، މީގެ ކުރިންވެސް އެކި ފަހަރުމަތިން ބޮޑެތި އަދަދުތަކުން ކުންފުނިތަކަށް ފައިސާ ދެއްކުމަށް ފެނަކަ ކޯޕަރޭޝަންގެ މައްޗަށް ސިވިލް ކޯޓުން ޙުކުމްކޮށްފައިވާކަމެވެ.
