އިދިކޮޅު އެމްޑީޕީން މިރޭ "ފުދިއްޖެ، ފުނޑިއްޖެ" ގެ ނަމުގައި އާޓިފިޝަލް ބީޗުން ފެށިގެން ކުރިއަށްގެންދިޔަ ހިނގާލުމުގައި، އެ ޕާޓީގެ ރައީސް އަބްދުﷲ ޝާހިދު ވަނީ ސަރުކާރުން މި އިހުތިޖާޖު ރަނގަޅަށް ބަލައި އަޑުއަހަން ގޮވާލައްވާފައެވެ. މިރޭ 8:00ގައި ފެށުނު މި ހިނގާލުމުގައި އެމްޑީޕީއަށް ތާއީދުކުރާ ގިނަ ބަޔަކު ވަނީ ބައިވެރިވެފައެވެ.
މިރޭގެ މުޒާހިރާގައި ވާހަކަ ދައްކަވަމުން، ރައްޔިތުންގެ މަޖިލީހުގެ ކުރީގެ ރައީސް އަދި ކުރީގެ ފޮރިން މިނިސްޓަރު ޝާހިދު ވިދާޅުވީ، ރައްޔިތުން މަގުމައްޗަށް ނިކުންނަން ޖެހުނީ، ރައްޔިތުން ނިކަމެތިވެ، އިގުތިސާދު ދަށަށް ގޮސް، ސަރުކާރުގެ ވައުދުތައް ނުފުއްދި، ގާނޫނު އަސާސީގެ ރޫހާ ހިލާފަށް ގިނަ ކަންތައްތަކެއް ކުރަމުންދާތީ ކަމުގައެވެ. މި އިހުތިޖާޖުގައި މުޒާހިރާގެ ބައިވެރިން ވަނީ ރައީސް ޑރ. މުހައްމަދު މުއިއްޒުގެ އިސްތިއުފާއަށްވެސް ގޮވާލާފައެވެ.
މި އިހުތިޖާޖުގައި ބައިވެރިންވަނީ ރައްޔިތުންގެ މަޖިލީހަށް އިންތިހާބުވާ ޕާޓީން ވަކިކުރުމުން މެމްބަރުކަމުގެ ގޮނޑި ގެއްލޭ ގޮތަށް ގާނޫނު އަސާސީއަށް ގެނެވުނު އިސްލާހުތަކާ ދެކޮޅަށްވެސް އަޑު އުފުލާފައެވެ. އެމްޑީޕީން ބުނެފައިވަނީ މި އިސްލާހުތައް ގެނެވިފައިވަނީ ގާނޫނު އަސާސީގެ 90 ވަނަ މާއްދާއާ މުޅިން ޚިލާފަށް ކަމުގައެވެ. މި އިސްލާހުތައް ބާތިލުކުރުމަށް ގޮވާލައި، އަދި ސަރުކަރުން އެއިސްލާހު ގެންނަންދެން، މުޅި ރާއްޖޭގައި އިހުތިޖާޖުކުރުމަށް ޑިސެމްބަރު މަހު ކާނިވާ ސަރަހައްދުގައި ބޭއްވުނު ގައުމީ މަޖިލީހުގެ ޖަލްސާގައި ވަނީ ފާސްކޮށްފައެވެ.
ނޮވެމްބަރު 20 ވަނަ ދުވަހު ތަސްދީގުކުރެވުނު މި އިސްލާހުތަކާ ގުޅިގެން، ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވަނީ ނޮވެމްބަރު 24 ވަނަ ދުވަހު މި އިސްލާހުތައް ބާތިލުކުރުމަށް އެދި ސުޕްރީމް ކޯޓަށް މައްސަލަ ހުށަހަޅުއްވާފައެވެ.
މިރޭގެ ހިނގާލުމުގެ މުޒާހިރާގެ ބައިވެރިން ވަނީ ގައުމީ ދިދައާއި އެމްޑީޕީގެ ދިދަ އުފުލައި، ސަރުކާރާ ދެކޮޅު ޝުއޫރުތައް ލިޔެފައިވާ ބެނާތައް ހިފައިގެން ހިނގާލުމުގައި ބައިވެރިވެފައެވެ. އެމްޑީޕީން ސަރުކާރާ ދެކޮޅަށް ބާއްވާ މިފަދަ ފުރަތަމަ ހިނގާލުމަށް ފުލުހުންގެ ފަރާތުން ސެކިއުރިޓީ ބެލެހެއްޓުން ވެސް ވަނީ ފޯރުކޮށްދީފައެވެ.
