ދިމަހް ޕްރައިވެޓް ލިމިޓެޑަށް 28 މިލިއަން ރުފިޔާ ދެއްކުމަށް ފެނަކަ ކޯޕަރޭޝަންގެ މައްޗަށް ސިވިލް ކޯޓުން އިއްޔެ ނިންމި ހުކުމް ކޮށްފިއެވެ. ފެނަކައަށް 28 މިލިއަން ރުފިޔާ ދައްކަން ހުކުމް ކޮށްފައިވަނީ، ދިމަހް ކުންފުނިން ކޮށްދިން މަސައްކަތަކަށް ލިބެންޖެހޭ 31 މިލިއަން ރުފިޔާގެ ތެރެއިން ފެނަކައިން މިހާތަނަށް އެންމެ 3 މިލިއަން ރުފިޔާ ދައްކާފައި ވާތީއެވެ.
މައްސަލަ ކޯޓަށް ހުށަހެޅުމުން، ފެނަކައިން ފުރަތަމަ އެދުނީ ކޯޓުން ބޭރުގައި މައްސަލަ ހައްލުކުރުމަށެވެ. ނަމަވެސް، އެކަމަށް ކޯޓުން ދިން މުއްދަތުގައި އެއްވެސް ހައްލެއް ހުށަނޭޅުމުން، ދިމަހް ކުންފުނިން އެދުނީ ޝަރީއަތުން މައްސަލައިގައި ގޮތެއް ނިންމައިދިނުމަށެވެ. ފެނަކައިން ވެސް އެއްބަސްވެފައިވަނީ ދިމަހް ކުންފުނިން އެދޭ ގޮތަށް ހުކުމްކުރުމަށެވެ.
މިގޮތުން ކޯޓުން ނިންމީ ބާކީ އޮތް 28 މިލިއަން ރުފިޔާ 11 މަހަށް ބަހާލައިގެން ދެއްކުމަށެވެ. ފެނަކައަކީ މީގެ ކުރިންވެސް މިފަދަ ގިނަ ހުކުމްތަކެއް އިއްވާފައިވާ، އަދި ސަރުކާރުގެ ކުންފުނިތަކުގެ ތެރެއިން އެންމެ ބޮޑަށް ދަރަނިވެރިވެފައިވާ ކުންފުންޏެވެ.
އޮޑިޓް ރިޕޯޓުތަކުން ދައްކާގޮތުގައި ކުރީގެ ސަރުކާރު ނިމުނުއިރު ފެނަކައިގެ ދަރަނި 4.3 ބިލިއަން ރުފިޔާއަށް އަރާފައިވެއެވެ. ފެނަކައިގެ ކުރީގެ އެމްޑީ މުއާޒް ރަޝީދު ވިދާޅުވެފައިވާ ގޮތުގައި، އޭނާ މަޤާމާ ހަވާލުވިއިރު އެކި ފަރާތްތަކުން ކުރުވާފައިވާ މަސައްކަތްތަކަށް 1.7 ބިލިއަން ރުފިޔާ ދައްކަން ޖެހިފައިވާކަމަށާއި، އޭގެ ތެރެއިން 300 މިލިއަން ރުފިޔާ ވަނީ ހަތް މަސްދުވަހުގެ ތެރޭގައި ދައްކާފައެވެ.
