އައްޑޫ ސިޓީގެ ކަރަންޓު މައްސަލަ ހައްލު ނުވެ ދިގުލައިގެން ދިއުމާ ގުޅިގެން ފެނަކަ ކޯޕަރޭޝަންގެ އިސްވެރިން މަޖިލީހަށް ހާޒިރުކުރުމަށް، އައްޑޫ ހިތަދޫ މެދު ދާއިރާގެ މަޖިލިސް މެންބަރު އަހުމަދު އަޒާން ވަނީ ހުށަހަޅުއްވައިފިއެވެ.
މަޖިލީހުގެ ރައީސް އަބްދުއްރަހިމް އަބްދުﷲ އަށް ފޮނުވި ސިޓީގައި އަޒާން ފާހަގަކުރެއްވި ގޮތުގައި، މި މައްސަލައިގައި ފެނަކައިގެ އިސްވެރިންގެ އިހުމާލާއި ފަރުވާކުޑަކަން ވަރަށް ބޮޑަށް ފެންނަން އެބަހުއްޓެވެ. އައްޑޫ އިންޖީނުގެއަށް ބޭނުންވާ ސްޕެއަރ ޕާޓްސް ހޯދުމަށް އެދި ހެޑް އޮފީހަށް ހުށަހަޅާފައިވާތާ އަހަރަކަށްވުރެ ގިނަ ދުވަސްވީއިރުވެސް އަދިވެސް ނުލިބި ހުރި ސްޕެއަރ ޕާޓްސް އެބަހުއްޓެވެ.
އަދި އައްޑޫ ސިޓީގެ މަޖިލިސް މެންބަރުންނާއި ފެނަކައިގެ ވެރިން ބައްދަލުކުރި ދުވަހު، ބޭނުންވާ ސްޕެއަރ ޕާޓްސް ހަފްތާއެއްގެ ތެރޭގައި ފޯރުކޮށްދޭނެކަމަށް ވަޢުދުވި ނަމަވެސް، މިހާތަނަށްވެސް އެ ތަކެތި ލިބިފައެއް ނުވެއެވެ. މުވައްޒަފުން ފާހަގަކުރާ ގޮތުގައި އިންޖީނުތަކަށް މައްސަލަ ދިމާވަނީ ސްޕެއަރ ޕާޓްސް ނުލިބި ލަސްވުމުގެ ސަބަބުން މެއިންޓެނަންސްއާއި މަރާމާތުގެ މަސައްކަތް ނުކުރެވޭތީއެވެ.
މި މައްސަލަ ބެލުމަށްޓަކައި ފެނަކައިގެ މެނޭޖިންގ ޑިރެކްޓަރު މުހައްމަދު ނަޖާހު، ކުރީގެ އަދި މިހާރުގެ ޕްރޮކިއުމެންޓް ހެޑުން ކަމުގައިވާ އަބްދުލް ވާހިދު އަދި މަރިޔަމް ޝަހުލާ، ޗީފް ފައިނޭންޝިއަލް އޮފިސަރު އަބްދުﷲ ވަހީދު، ކުރީގެ ޗީފް ފައިނޭންޝިއަލް އޮފިސަރު މުހައްމަދު މަސްއޫދު، އަދި ޗީފް ޓެކްނިކަލް އޮފިސަރު އަބްދުﷲ ނާޝިދު މަޖިލީހުގެ ކޮމިޓީއަށް ހާޒިރުކޮށްދިނުމަށް އަޒާން ވަނީ އެދިވަޑައިގެންފައެވެ. އަދި ހާޒިރުވާއިރު، އައްޑޫގެ ކަރަންޓު މައްސަލަ ހައްލުކުރުމަށް އެކުލަވާލާފައިވާ ޓައިމްލައިން ނުވަތަ ޕްލޭނެއް އޮތްނަމა އެ މަޢުލޫމާތު ގެނައުމަށްވެސް އަޒާންގެ ސިޓީގައި ވަނީ އެދިވަޑައިގެންފައެވެ.
