ޑިމޮކްރެޓްސް ޕާޓީގެ އައު ރައީސް އަދި ފިރިހެން ނައިބު ރައީސްގެ މަގާމުތަކަށް އައު ބޭފުޅުން މިރޭ އައްޔަންކުރެވިއްޖެ އެވެ. މި ގޮތުން ޕާޓީގެ ރައީސްގެ މަގާމަށް އިމްތިޔާޒު ފަހުމީ އަދި ފިރިހެން ނައިބު ރައީސްގެ މަގާމަށް މުހައްމަދު ވަހީދު (ވައްޑެ) އިންތިހާބުވެފައިވާ ކަމަށް ޕާޓީން އިއުލާނުކޮށްފި އެވެ.
މި އިންތިހާބު ބޭއްވުނީ އެމްޑީޕީގެ އެތެރޭގެ ހިޔާލުތަފާތުވުންތަކެއްގެ ތެރެއިން މިދިޔަ އަހަރު އުފެއްދި ޑިމޮކްރެޓްސްގެ ފުރަތަމަ ރައީސް، މަޖިލީހުގެ ހެންވޭރު ހުޅަނގު ދާއިރާގެ ކުރީގެ މެންބަރު ހަސަން ލަތީފް އަދި ފިރިހެން ނައިބު ރައީސް މުހައްމަދު ޝިފާޒު ޕާޓީ ދޫކޮށް އަނބުރާ އެމްޑީޕީއާ ގުޅުމާ ގުޅިގެންނެވެ. އެ ދެބޭފުޅުން ޕާޓީން ވަކިވުމާ ގުޅިގެން ހުސްވި މަގާމުތަކަށް ކުރިމަތިލުމުގެ ފުރުސަތު ހުޅުވާލުމުން ކުރިމަތިލެއްވީ އިމްތިޔާޒު އަދި ވަހީދު އެކަނި ކަމަށްވާތީ، މިރޭ ބޭއްވުނު ޑިމޮކްރެޓްސްގެ ނެޝަނަލް އެސެމްބްލީގައި ބައިވެރިވި 34 މެންބަރުން ވަނީ އެ ދެ މަގާމަށް އެ ދެ ބޭފުޅުން އައްޔަންކުރުމަށް ޕާޓީގެ އިލެކްޝަންސް ކޮމެޓީން ނިންމި ނިންމުން އެންޑޯޒްކޮށްފައެވެ.
ފާހަގަކޮށްލެވޭ ގޮތުގައި ޑިމޮކްރެޓްސްއިން މި ފަހުން ހަސަން ލަތީފާއި ޝިފާޒުގެ އިތުރުން، ޑިމޮކްރެޓްސްގެ ޕާލިމެންޓްރީ ގްރޫޕުގެ ލީޑަރުކަން ކުރެއްވި އަލީ އާޒިމާއި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ވެސް ވަނީ އެމްޑީޕީއަށް ސޮއިކުރައްވާފައެވެ.
