އިންޑިއާގެ 76 ވަނަ ޖުމްހޫރީ ދުވަހާ ގުޅިގެން ރައީސް ޑރ. މުހައްމަދު މުއިއްޒު 'އެކްސް' މެދުވެރިކޮށް އިންޑިއާގެ ބޮޑުވަޒީރު ނަރެންދުރަ މޯދީއަށް ތަހުނިޔާ ފޮނުއްވިއެވެ. އެ ތަހުނިޔާގެ މެސެޖުގައި ރައީސް މުއިއްޒު ފާހަގަކުރެއްވީ އިންޑިއާއާއެކު އޮތް ގުޅުން އިތުރަށް ބަދަހިކޮށް، ދެ ގައުމަށް ފައިދާވާ ދާއިރާތަކުން އެކުގައި މަސައްކަތްކުރެއްވުމަށް ތައްޔާރަށް ހުންނެވި ކަމަށެވެ.
ރައީސް މުއިއްޒުގެ މި މެސެޖަށް ޖަވާބު ދެއްވަމުން ބޮޑުވަޒީރު މޯދީ ވިދާޅުވީ ރާއްޖެއާ އޮތް ޒަމާންވީ ގުޅުމާމެދު އެމަނިކުފާނުވެސް ދެކިވަޑައިގަންނަވަނީ ހަމަ އެގޮތަށް ކަމަށާއި، ރާއްޖެއާއެކު ރަހުމަތްތެރިކަމުގެ ގުޅުން އިތުރަށް ބަދަހިކޮށް، އެކި ކަންކަމުގައި އެއްބާރުލުން އިތުރުކުރުމަށްވެސް ތައްޔާރަށް ހުންނެވި ކަމަށެވެ.
މި ވެރިކަމުގެ ކުރީކޮޅު އިންޑިއާއާ ގުޅުން ގޯސްވެފައި އޮތް ނަމަވެސް، މިހާރު އެ ގުޅުން ވަނީ އިތުރަށް ބަދަހިވެފައެވެ.
އެގޮތުން، މިދިޔަ އޮކްޓޫބަރު މަހުގެ ކުރީކޮޅު އިންޑިއާގެ ރައީސްގެ ދަޢުވަތަކަށް ރައީސް މުއިއްޒު އެ ގައުމަށް ދަތުރުފުޅެއް ކުރެއްވިއެވެ. މި ދަތުރުފުޅުގައި ދެ ގައުމުގެ ދެމެދު އެއްބަސްވުންތަކާއި ފަހުމުނާމާތަކުގައި ސޮއިކުރެވި، ނޯޓް ވާބަލް ބަދަލުކުރެވި އަދި ބައެއް މަޝްރޫޢުތައް އިފްތިތާޙު ކުރެވުނެވެ.
ރާއްޖެއާއި އިންޑިއާއާ ދެމެދު ޚާރިޖީ ގުޅުން ޤާއިމުކުރިތާ 60 އަހަރު ފުރޭ މުނާސަބަތާ ގުޅިގެން މި އަހަރު ރާއްޖެއަށް ފުރަމާނަ ދަތުރުފުޅެއް ކުރެއްވުމަށް ރައީސް މުއިއްޒު ވަނީ ބޮޑުވަޒީރު މޯދީއަށް ދަޢުވަތު އަރުވާފައެވެ.
