އަހްމަދިއްޔާ އިންޓަނޭޝަނަލް ސްކޫލުން މިއަދު ފުރަތަމަ ފަހަރަށް ދަރިވަރުންގެ ނަމޫނާ ސާކް ސަމިޓެއް ބާއްވައިފިއެވެ. މި ސަމިޓުގައި ސާކްގެ އަށް ގައުމު ކަމުގައިވާ ދިވެހިރާއްޖެ، ސްރީލަންކާ، އިންޑިއާ، ޕާކިސްތާން، ބޫޓާން، ނޭޕާލް، އަފްގާނިސްތާން އަދި ބަންގްލަދޭޝްގެ އިސްވެރިންނާއި މަންދޫބުންގެ ގޮތުގައި ދަރިވަރުން ބައިވެރިވިއެވެ.
ފޮރިން މިނިސްޓްރީގެ އެހީތެރިކަމާއެކު ކުރިއަށްގެންދިޔަ މި ސަމިޓުގައި ދަރިވަރުން ވަނީ ސާކް އަށް ގައުމުގެ ލީޑަރުންނާއި، ފޮރިން މިނިސްޓަރުން، ފޮރިން ސެކްރެޓަރީން އަދި ކޮންމެ ގައުމެއްގެ ސާކް ޑެސްކުގެ އެއް ބޭފުޅެއްގެ ދައުރު އަދާކޮށްފައެވެ. އަދި ސާކްގެ ސެކްރެޓަރީ ޖެނެރަލާއި އެޑްމިން އަދި އަށް ގައުމުގެ ޑިރެކްޓަރުންގެ ރޯލުވެސް ދަރިވަރުން ވަނީ އަދާކޮށްފައެވެ.
ސަމިޓުގައި ދަރިވަރުން އިއްވި ސްޓޭޓްމަންޓްތަކުގައި، ސައުތު އޭޝިއާ ސަރަހައްދުގެ ތިމާވެށި، އިގްތިސާދު، އަދި އިންސާނީ ހައްގުތަކާ ގުޅޭ މައްސަލަތަކަށް އަލިއަޅުވާލައި، އެ މައްސަލަތަކަށް ހައްލު ހޯދުމަށް އެކި ފަންޑުތައް އުފެއްދުމާއި، ގައުމުތަކުގެ މެދުގައި އެއްބާރުލުން އިތުރުކުރުމުގެ ހުށަހެޅުންތައް ހުށަހަޅާފައިވެއެވެ.
މި ސަމިޓް ޝަރަފުވެރިކޮށްދެއްވި ފޮރިން މިނިސްޓަރު ޑރ. އަބްދުﷲ ޚަލީލް ވަނީ ދަރިވަރުންގެ ދިރާސާތަކާއި، ސަމިޓުގެ ހުށަހެޅުންތަކާއި އިންތިޒާމްތަކަށް މަރުހަބާ ކިޔުއްވާފައެވެ. މިފަދަ ހަރަކާތްތަކަކީ ދަރިވަރުންގެ ތައުލީމީ ހަޔާތުގައި މުހިންމު ކަމެއްކަމަށާއި، މިފަދަ ހަރަކާތްތައް ސްކޫލް ކަރިކިއުލަމްގައި ހިމެނުން މުހިންމުކަމަށް އެމަނިކުފާނު ވިދާޅުވިއެވެ.
ސްކޫލުގެ ހިސްޓްރީ ޓީޗަރު މުހައްމަދު ސަލީމް ވިދާޅުވި ގޮތުގައި މި ސަމިޓުގެ އެންމެ ބޮޑު ކާމިޔާބީއަކީ، ދަރިވަރުން ސާކް ގައުމުތަކުގެ މައްސަލަތައް ދިރާސާކޮށް، އެ މައްސަލަތަކާ ގުޅޭ ސްޓޭޓްމަންޓްތައް ތައްޔާރުކުރުމުގައި ދެއްކި ހިތްވަރާއި ކުރި މަސައްކަތެވެ. ގްރޭޑް 7 އިން 10 އަށް ނެގުނު ދަރިވަރުންނަށް މި ސަމިޓަށް ތައްޔާރުވުމަށް މަހަކަށްވުރެ ގިނަ ދުވަސް ނަގާފައިވާއިރު، ކުރިއަށް އޮތް ތަނުގައިވެސް މިފަދަ ހަރަކާތްތައް ކުރިއަށް ގެންދާނެކަމަށް ސްކޫލުން ވަނީ ހާމަކޮށްފައެވެ.
1985 ވަނަ އަހަރު އުފެދުނު ސާކްގެ އެންމެ ފަހު ސަމިޓް އޮތީ 2014 ވަނަ އަހަރު ނޭޕާލްގައެވެ. އެއީ 18 ވަނަ ސާކް ސަމިޓެވެ. ދިވެހިރާއްޖޭގައި އެންމެ ފަހުން ސާކް ސަމިޓް ބޭއްވުނީ 2011 ވަނަ އަހަރު އައްޑޫ ސިޓީގައެވެ. ސާކް ސަމިޓްތަކުގެ މަގުސަދަކީ ސަރަހައްދީ ހަމަޖެހުމާއި ގައުމުތަކުގެ ކުރިއެރުމަށް މެމްބަރު ގައުމުތަކުގެ މެދުގައި މަޝްވަރާކޮށް، އެކި ކަންކަމުގައި އެއްބާރުލުން ދިނުމެވެ.
