ގްރޭޑް ރިޕީޓްކުރުމުގައި ތަފާތުކުރި ކަމަށް ބުނެ ޕްރީސްކޫލް ދަރިވަރެއްގެ މައްސަލަ ކޯޓަށް ހުށަހަޅައިފިއެވެ.
މިމައްސަލައަކީ، މީލާދީ އަހަރުގެ ކުރީކޮޅަށް ދިރާސީ އަހަރު ފެށުން ބަދަލުކުރުމާ ގުޅިގެން އެޑިޔުކޭޝަން މިނިސްޓްރީން ނެރުނު، ސްކޫލަށް ކުދިން ވައްދާ އުމުރުފުރާ ބަދަލުކުރުމުގެ ސާކިއުލާއަކަށް ރިއާޔަތްކޮށް، ގްރޭޑް ރިޕީޓްކުރުމުގައި ތަފާތުކުރުން ގެންގުޅޭކަމަށް ބުނެ ކެންގަރޫ ކިޑްސްގެ ދަރިވަރެއްގެ ބެލެނިވެރިއަކު މިދިޔަ އަހަރުގެ އޮގަސްޓް މަހު ސިވިލް ކޯޓަށް ހުށަހެޅި މައްސަލައެކެވެ. މި މައްސަލައިގެ އަޑުއެހުންތައް އިއްޔެ ކޯޓުން ވަނީ ނިންމާލާއިފިއެވެ.
މައްސަލަ ހުށަހެޅި ބެލެނިވެރިޔާ ކޯޓުގައި ފާހަގަކޮށްފައިވަނީ އެޑިއުކޭޝަންގެ ސާކިއުލާ އަކީ ދަރިވަރުން އަލަށް ސްކޫލަށް ވެއްދުމާއި އެއް ސްކޫލުން އަނެއް ސްކޫލަށް ބަދަލުކުރުމުގައި މިދިޔަ އަހަރު ބަލަން އޮތް އުމުރުފުރާއަށް ކަމަށްވާތީ، މިހާރު ކިޔަވަމުންދާ ދަރިވަރުންނަށް މި ސާކިއުލާ ނުހިނގާނެ ކަމަށެވެ. އަދި މާޒީގައި ހިނގާފައިވާ ކަމަކަށް ފަހުން އެކުލަވާލާ ގާނޫނީ އާ ހަމައެއް ނުހިނގާނެ ކަމަށްވެސް ވަނީ ފާހަގަކޮށްފައެވެ.
އިތުރަށް ބެލެނިވެރިޔާ ފާހަގަކޮށްފައިވަނީ ކުޑަކުދިންގެ ހައްގުތަކުގެ ގާނޫނުގައި ދައުލަތުގެ އިދާރާތަކަށް ކުދިންގެ މައްސަލަތައް ހުށަހެޅުމުން، އެ ކުދިންގެ ހާއްސަ ހާލަތްތަކަށް ރިއާޔަތްކުރަންޖެހޭނެ ކަމަށް ބަޔާންކޮށްފައިވީ ނަމަވެސް މިނިސްޓްރީން އެގޮތަށް އަމަލުކޮށްފައި ނުވާކަމަށެވެ. އަދި އެޑިއުކޭޝަންގެ ސާކިއުލާ ނެރުމަށްފަހުވެސް ކެންގަރޫ ކިޑްސް އާއި މިނިސްޓްރީގެ ހުއްދައާއެކު އެހެން ބައެއް ސްކޫލްތަކަށް ވައްދާފައިވާ މިފަދަ ދަރިވަރުން ގްރޭޑު ރިޕީޓުނުކޮށް ދެން އޮންނަ ގްރޭޑަށް ބަދަލުކޮށްދީފައިވާކަންވެސް ފާހަގަކޮށްފައިވެއެވެ.
މައްސަލައިގައި ބެލެނިވެރިޔާ އެދިފައިވަނީ އެޑިއުކޭޝަން މިނިސްޓްރީގެ ސާކިއުލާ ދަރިވަރުގެ މައްޗަށް ނުހިނގާނެކަމާއި، ދަރިވަރު ރިޕީޓްކުރަން ޖެހޭ ކަމަށް ނިންމި ނިންމުމަކީ ބާތިލް ނިންމުމެއް ކަމަށް ކަނޑައަޅައި ދިނުމަށެވެ. އަދި ނާސަރީއަށް ޕްރޮމޯޝަން ދިނުމަށްފަހު ކިންޑަގާޓެން ގްރޭޑުތަކަށްވެސް ކޮންމެ އަހަރަކު އޮޓޮމެޓިކުން ޕްރޮމޯޝަން ދިނުމަށް ކޯޓުން އަމުރުކޮށްދިނުމަށްވެސް އެދިފައިވެއެވެ.
ދައުލަތުން ޝަރީއަތުގައި ބުނެފައިވަނީ ކޮވިޑް-19 ގެ މުއްދަތުގައި މެނުވީ އެހެން އެއްވެސް ދަރިވަރަކު ގްރޭޑަކުން އަނެއް ގްރޭޑަކަށް ބަދަލުކޮށްދީފައި ނުވާނެ ކަމަށެވެ. ނަމަވެސް، ބެލެނިވެރިޔާ އެކަން ދެކޮޅުހަދާފައިވާތީ، ކެންގަރޫ ކިޑްސް އާއި އެޑިއުކޭޝަނުން އެ މައުލޫމާތު ސިވިލް ކޯޓަށް ދިނުމަށް އަމުރެއް ނެރުނެވެ. އެ އަމުރާ ގުޅިގެން ކެންގަރޫ ކިޑްސްއިން ހުށަހެޅި ލިޔެކިޔުންތަކުން އެނގުނީ 2024 ވަނަ އަހަރު އެ ސްކޫލުން އެކަނިވެސް ނާސަރީން ޖޭކޭޖީއަށް 29 ކުއްޖަކު ޕްރޮމޯޓްކޮށްދީފައިވާ ކަމާއި، ސާކިއުލާގެ ދަށުން ގްރޭޑެއް ނިންމާފައިވާ ނަމަ އަނެއް ގްރޭޑަށް ބަދަލުކުރުމަށް އެއްވެސް ހުއްދައެއް ހޯދާކަށް ނުޖެހޭކަމެވެ.
މީގެއިތުރުން، އެޑިއުކޭޝަން މިނިސްޓްރީން އަތޮޅުތަކުގެ ސްކޫލްތަކަށް ފޮނުވާފައިވާ އީމެއިލްއެއްގައި ބުނެފައިވަނީ މިދިޔަ އަހަރުގެ ފަހު ދުވަހަށް އުމުރު ހަމަނުވާ ކުދިން ކިޔަވަމުންދާ ގްރޭޑުގައި ރިޕީޓްކުރަން ބެލެނިވެރިޔަކު ބޭނުންވާނަމަ އެ ފުރުސަތު ދެވޭނެ ކަމަށާއި، ނަމަވެސް އެއީ ސްކޫލްތަކުން ބާރުއަޅައިގެން ނުވަތަ މަޖުބޫރުކޮށްގެން ދޭންވާނެ ފުރުސަތެއް ނޫންކަމަށެވެ.
މި މައްސަލައިގެ އަޑުއެހުންތައް އިއްޔެ ނިމުމާއެކު، ކުރިއަށް އޮތް މަހެއްހާ ދުވަސް ތެރޭ ހުކުމް އިއްވާނެ ކަމަށް ބެލެވެއެވެ.
