ރޭ 10:00 ހާއިރު މާލޭގައި ހިނގި، ބިދޭސީއަކަށް ތޫނު އެއްޗަކުން ބިރުދައްކައިގެން ފޭރިގަތުމުގެ މައްސަލައެއްގައި ތިން މީހަކު ހައްޔަރުކޮށްފިއެވެ.
މި މައްސަލަ ފުލުހުންނަށް އެނގުނީ ރަސްފަންނު ސަރަހައްދުގައި ޕެޓްރޯލް ކުރަމުންދިޔަ ފުލުހުންގެ ބީޓަކަށް ބަޔަކު ދުވެފައި ދިޔުމާ ގުޅިގެން، އެ މީހުންގެ ފަހަތުން ދުވެފައި ދިޔަ މީހަކާ ސުވާލުކުރުމުންނެވެ. އެއީ ފޭރުމުގެ ޝިކާރައަކަށްވި ބިދޭސީއެވެ. މާލޭގައި ޕެޓްރޯލްކުރަމުންދިޔަ އެހެން ބީޓުތަކުގެ އެހީތެރިކަމާއެކު، ނޯތު ހާބަރު ސަރަހައްދުން މި މައްސަލައިގައި ތިން މީހަކު ވަނީ ހައްޔަރުކޮށްފައެވެ.
ފުލުހުން ބުނާ ގޮތުގައި މި ފޭރުމުގައި އެ ބިދޭސީގެ އަތުން ފޭރިގަތީ 1،000 ދިވެހި ރުފިޔާއާއި، 10 ޔޫރޯއާއި، 10 ބަންގްލަދޭޝީ ޓަކާއާއި، 20 ސްރީލަންކަން ރުޕީއާއި، 500 އިންޑިއަން ރުޕީއާއި، އަދި ދެ ސިންގަޕޫރު ޑޮލަރެވެ. މީގެ ތެރެއިން 1،000 ދިވެހި ރުފިޔާއާއި 20 ސްރީލަންކަން ރުޕީއާއި ދެ ސިންގަޕޫރު ޑޮލަރު ވަނީ ހައްޔަރުކުރެވުނު މީހުންގެ އަތުން ފެނިފައެވެ.
ހައްޔަރުކުރެވުނު މީހުންނަކީ ސ. ހިތަދޫ، އައްޒަ، މުބާރިކު މުހައްމަދު (34 އަހަރު)، އާއި ޏ. ފުވައްމުލަށް، ދިގުވާނޑު، އަހުމަދު ފަޔާޒު (30 އަހަރު)، އަދި ޏ. ފުވައްމުލަށް، ދިގުވާނޑު، އަހުމަދު ނަދީފް (36 އަހަރު) އެވެ. މި މީހުންގެ ބަންދާމެދު ގޮތެއް ނިންމުމަށް ކޯޓަށް ގެންދިޔަކަން ފުލުހުން އަދި ހާމަކޮށްފައެއް ނުވެއެވެ. ނަމަވެސް މި މައްސަލައިގެ ތަހުގީގު އަދިވެސް ކުރިއަށްދާކަމަށް ފުލުހުން ބުނެފައިވެއެވެ.
