ހދ. މަކުނުދޫ ކައުންސިލްގެ ބައި-އިލެކްޝަނަށް ކުރިމަތިލި އަމިއްލަ ކެންޑިޑޭޓެއްގެ ކެންޑިޑެސީ ބަލައިނުގަތުމަށް އިލެކްޝަން ކޮމިޝަނުން ނިންމި ނިންމުން ހައި ކޯޓުން މިއަދު ބާތިލުކޮށްފިއެވެ.
އިލެކްޝަން ކޮމިޝަނުން އެ ކެންޑިޑޭޓުގެ ކެންޑިޑެސީ ބަލައިނުގަތީ އައިޑީ ކާޑުގެ ކޮޕީ ހުށަނާޅާ ކަމަށް ބުނެއެވެ. މިކަމުގެ ސަބަބުން، އެ ދާއިރާއަށް ކުރިމަތިލީ ވެރިކަންކުރާ ޕީއެންސީގެ ކެންޑިޑޭޓު ވަނީ ވާދަނުކޮށް ހޮވިފައިވާކަން އިލެކްޝަން ކޮމިޝަނުން އިއުލާނުކޮށްފައެވެ.
ނަމަވެސް، އަމިއްލަ ކެންޑިޑޭޓު ކޯޓަށް ހުށަހެޅި މައްސަލައިގައި ފާހަގަކުރި ގޮތުގައި، އޭނާގެ ލިޔެކިޔުންތައް އިލެކްޝަން ކޮމިޝަނުން ވަނީ ބަލައިގަނެ، ކުރިމަތިލުމަށް ދައްކަންޖެހޭ ފައިސާ ވެސް ދައްކާފައެވެ. އަދި އޭގެ ރަސީދު ވެސް ވަނީ އިލެކްޝަން ކޮމިޝަނަށް ފޮނުވާފައެވެ.
ހައި ކޯޓުގެ މި ނިންމުމާ ގުޅިގެން، އިލެކްޝަން ކޮމިޝަނުން ވަނީ އެ ކެންޑިޑޭޓުގެ ކެންޑިޑެސީ ބަލައިގަނެ، ފެބްރުއަރީ 8 ގައި ބޭއްވުމަށް ހަމަޖެހިފައިވާ ބައި-އިލެކްޝަނުގައި ވާދަކުރާ ކެންޑިޑޭޓުންގެ ނަންތައް ތަރުތީބުކުރުމުގެ ގުރުއަތުލުން ހޮނިހިރު ދުވަހު އޮންނާނެކަން އިއުލާނުކޮށްފައެވެ.
