މާލޭގެ އާޓިފިޝަލް ބީޗް ސަރަހައްދު ކުރިމަތީގައި ހުރި އެމްޑީޕީގެ ކުރީގެ މައި ހަރުގެ ހުރި ބިން އަނބުރާ ހޯދުމަށް އެ ޕާޓީން ސިވިލް ކޯޓުގައި ކުރި ދައުވާ އަނބުރާ ގެންގޮސްފިއެވެ.
އެމްޑީޕީގެ ސިޔާސީ ހަރަކާތްތައް ހިންގުމަށް ބޭނުންކުރި މައި ހަރުގެ ހުރި ބިމަކީ އެ ޕާޓީގެ ކުރީގެ އިސް މެންބަރު ޝަފިއްޔާ ޒުބައިރުގެ މިލްކިއްޔާތެކެވެ. ނަމަވެސް ޕާޓީގެ އެތެރޭގެ ހަމަނުޖެހުންތަކާ ގުޅިގެން 2023 ވަނަ އަހަރު ޝަފިއްޔާ ވަނީ އެމްޑީޕީން ވަކިވެފައެވެ.
އެމްޑީޕީން ހަރުގެ ހުސްކުރުމަށް ދެވުނު މުއްދަތު ހަމަވުމާ ގުޅިގެން، ޝަފިއްޔާ ވަނީ އެ ބިން އެހެން ފަރާތަކަށް ކުއްޔަށް ދީފައެވެ. އެއަށްފަހު އެތަނުގައި ޑިމޮކްރެޓްސް ޕާޓީގެ ހަރުގެ ހެދިއެވެ. އެހެންނަމަވެސް މިހާރު އެތަނުގައި ހިންގަމުންދަނީ ޕީއެންސީގެ ޖަގަހައެވެ.
އެމްޑީޕީން މި މައްސަލަ ސިވިލް ކޯޓަށް ހުށަހެޅީ، އެތަން ހުސްކުރުމަށް އެންގީ އެއްބަސްވުމާ ހިލާފަށް ކަމަށް ބުނެއެވެ. އަދި އެ ޕާޓީން ކުރިން ދައްކަމުންދިޔަ ކުލީގައި އެތަން ބޭނުންކުރުމުގެ ހައްގު އޮންނާނެކަމަށް ކަނޑައަޅައިދިނުމަށް އެދިފައިވެއެވެ.
ސިވިލް ކޯޓުން މައްސަލަ ނިންމި ހުކުމުގައި ބުނެފައިވަނީ، މައްސަލަ ކުރިއަށް ގެންދިއުމަކީ ދެފަރާތަށްވެސް އިތުރު ފައިދާއެއް ނުވާނެ ކަމެއްކަމަށެވެ. އަދި އެއީ ވަގުތާއި މާލީގޮތުން އިތުރު ގެއްލުންތަކެއް ލިބިދާނެ ކަމެއްކަމަށް ވާތީ، އެމްޑީޕީން މިދިޔަ މަހު ދައުވާ އަނބުރާ ގެންދިއުމަށް ހުށަހެޅުމާ ގުޅިގެން، ކޯޓުން ވަނީ މައްސަލަ ނިންމާލާފައެވެ.
