ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރ. އަތޮޅަށް ކުރައްވާ ދަތުރުފުޅުގެ ތެރެއިން ރ. ކިނޮޅަހު ކައުންސިލްގެ އާ އިމާރާތުގެ ބިންގާ މިއަދު އަޅައިފިއެވެ. މި އިމާރާތުގެ ބިންގާ އަޅުއްވައިދެއްވީ ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފު އުމަރުއެވެ.
މި އިމާރާތަކީ މެލޭޝިއާގެ ހެކްސްޓަރ ގްލޯބަލް ކުންފުންޏާ ހަވާލުކޮށްގެން ކުރިއަށްގެންދާ މަޝްރޫޢުގެ ދަށުން އިމާރާތްކުރެވޭ ކައުންސިލް އިދާރާއެކެވެ. މި މަޝްރޫޢުގެ ދަށުން ޙާލަތު ދަށްކޮށްހުރި 55 ކައުންސިލް އިމާރާތް އަލުން ތަރައްޤީކުރުމަށް ވަނީ ހަމަޖެހިފައެވެ. މިހާތަނަށް މި މަޝްރޫޢުގެ ދަށުން ރ. އިންނަމާދޫ އާއި ރ. މަޑުއްވަރި ހިމެނޭ ގޮތަށް 4 ރަށެއްގެ ކައުންސިލް އިމާރާތުގެ ބިންގާ ވަނީ އަޅާފައެވެ.
ސަރުކާރުން ވިދާޅުވި ގޮތުގައި ރައީސް މުޢިއްޒުގެ ސަރުކާރުން ލާމަރުކަޒީ ނިޒާމުގެ ދަށުން ކައުންސިލްތައް ބާރުވެރިކުރުމަށް ޚާއްޞަ އިސްކަމެއް ދެއްވައިގެން ކުރިއަށްގެންދާ މި މަޝްރޫޢުގެ ސަބަބުން ކައުންސިލްތައް ހިންގުމަށް އިތުރު ލުއިފަސޭހަކަން ލިބި، ރަށުގެ ރައްޔިތުންނަށް އުފާފާގަތިކަން ލިބިގެންދާނެއެވެ.
