އިލެކްޝަންސް ކޮމިޝަންގެ ހުސްވެފައިވާ ރައީސާއި ނައިބު ރައީސްގެ މަޤާމުތަކަށް މެންބަރުން އައްޔަނުކުރުމަށް ޤާނޫނުގައި ކަނޑައަޅާފައިވާ 60 ދުވަހުގެ މުއްދަތު ހަމަވެއްޖެއެވެ. މި މަޤާމުތައް ހުސްވީ މިދިޔަ ނޮވެންބަރުމަހުގައި ކަމަށްވާއިރު، ރައީސްގެ މަޤާމު ހުސްވެފައިވަނީ ފުވާދު ތައުފީގުގެ މެންބަރުކަމުގެ ދައުރު ހަމަވުމާ ގުޅިގެންނެވެ. އަދި ނައިބު ރައީސްގެ މަޤާމު ހުސްވެފައިވަނީ އަލީ ނަޝާތު މަޤާމުން ވަކިކުރުމަށް ރައްޔިތުންގެ މަޖިލީހުން ފާސްކުރުމާ ގުޅިގެންނެވެ. މީގެއިތުރުން، މުޙައްމަދު އާސިފްވެސް ވަނީ މެންބަރުކަމުން ވަކިކުރެވިފައެވެ.
ޤާނޫނުގައި މިހާރު ބަޔާންކޮށްފައިވާ ގޮތުން، މި މަޤާމުތައް ހުސްވާތާ 60 ދުވަހުގެ ތެރޭގައި، ކޮމިޝަންގެ މެންބަރުންގެ ތެރެއިން ރައީސުލްޖުމްހޫރިއްޔާއަށް ފެނިވަޑައިގަންނަވާ ނަންތައް މަޖިލީހަށް ހުށަހަޅައި، މެންބަރުން އައްޔަނުކުރަންޖެހެއެވެ. މިއީ ކުރިން އޮތްގޮތާ ތަފާތު އުސޫލެކެވެ. ކުރިން ރައީސާއި ނައިބު ރައީސް ހޮވަމުން އައީ މެންބަރުންގެ މެދުގައި ބާއްވާ ޖަލްސާއެއްގައި ނަގާ ވޯޓަކުންނެވެ.
ފާއިތުވި ދެމަހުގެ ތެރޭގައި ކޮމިޝަނަށް ތިން މެންބަރަކު އައްޔަނުކުރުމަށް މަޖިލީހުން ވަނީ ފާސްކޮށްފައެވެ. އެއީ އަބްދުލްހަސީބު އިސްމާއީލާއި، މުޙައްމަދު ޒާހިދު، އަދި އަބްދުއްރަޙްމާން ސަލާޙު ރަޝީދެވެ. ނަމަވެސް މިހާތަނަށް މެންބަރުކަމަށް ރަސްމީކޮށް އައްޔަނުކުރެވިފައިވަނީ ހަސީބު އެކަންޏެވެ. މިމައްސަލައާ ގުޅޭގޮތުން ޕީއެންސީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ފަލާޙް، ރައީސް އޮފީސް އަދި ރައްޔިތުންގެ މަޖިލީހުގެ އެއްވެސް ބަހެއް މިހާތަނަށް ލިބިފައެއް ނުވެއެވެ.
