ރައީސް ޑރ. މުހައްމަދު މުއިއްޒަކީ ދިވެހިންނަށް އެންމެ އޯގާތެރި ރައީސް ކަމަށާއި އެވަރުގެ ރައީސެއް ދެން ނުލިބޭނެ ކަމުގައި ޕީއެންސީގެ ޕާލިމެންޓަރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ. ރައީސް މުއިއްޒު ރ. އަތޮޅަށް ކުރައްވަމުންދާ ދަތުރުފުޅުގެ ތެރެއިން އިންނަމާދޫގައި ބޭއްވި ޖަލްސާގައި ވާހަކަފުޅު ދައްކަވަމުން، ކުރީގެ ރައީސުންނާއެކުވެސް މަސައްކަތްކުރެއްވި ނަމަވެސް، ރައީސް މުއިއްޒު ފަދަ އޯގާތެރި ވެރިއެއް ދިވެހިންނަށް ނުފެންނާނެ ކަމަށް ފަލާހު ވިދާޅުވިއެވެ.
ޔަގީންކަން ދޭން ބޭނުން ވަނީ، ތިބޭފުޅުންނަކަށް އަޅުގަނޑުމެންގެ މިއަދުގެ ރައީސުލްޖުމްހޫރިއްޔާ ވަރުގެ ރައީސެއް ނުލިބޭނެއޭ. ވަކި މި ރަށު ރައްޔިތުންނެއް ނޫން، މި ދާއިރާ ރައްޔިތުންނެއް ނޫން، ދިވެހިރާއްޖޭގެ ލޮބުވެތި އެއްވެސް ރައްޔިތަކަށް ލިބޭނެ އެންމެ އޯގާތެރި އެންމެ ހިތްހެޔޮ ރައީސުލްޖުމްހޫރިއްޔާ އަކީ އަޅުގަނޑުމެންގެ ރައީސް.
ފަލާހު ވިދާޅވި އެވެ.
ފަލާހު އިތުރަށް ފާހަގަކުރެއްވި ގޮތުގައި ކުރިއަށް އޮތް ތަނުގައި ދިވެހިންނަށް ފެނިގެންދާނީ ޤައުމު ކުރިއަރުވައި، ޤައުމުގައި ހުރި މައްސަލަތައް ހައްލުކުރައްވާނެ ވެރިއެކެވެ. އަދި މީގެ ކުރިން ވެރިން ކުރަން ބޭނުންވެވަޑައިގެންނެވި ނަމަވެސް، ދެވަނަ ދައުރެއްގެ ދަހިވެތިކަމުގައި ނުކުރެވި ހުރި އެތައް ކަމެއް ރައީސް މުއިއްޒުގެ ވެރިކަމުގެ އެއް އަހަރު ތެރޭގައި ހައްލުކުރައްވާފައިވާ ކަމަށް ވެސް ފަލާހު ވިދާޅުވިއެވެ.
ފަލާހުގެ ވާހަކަފުޅުގައި އިތުރަށް ފާހަގަކުރެއްވި ގޮތުގައި ތަރައްޤީއަކީ ހަމައެކަނި ރަށެއްގައި ހިންގާ މަޝްރޫޢުތަކެއް ނޫނެވެ. އޭގެ ބަދަލުގައި، ދިވެހި މުޖުތަމަޢުގެ ތެރޭގައި ހުރި މަސްތުވާތަކެއްޗާއި އެނޫންވެސް ނުބައި އާދަތައް ހައްލުކުރެވިއްޖެނަމަ ޤައުމުގެ މުސްތަޤުބަލު އުޖާލާވާނެ ކަމަށާއި، ރައީސް މިހާރު އަޅުއްވަމުން ގެންދަވަނީ މި ދެންނެވި ފިޔަވަޅުތައް ކަމަށް ފަލާހު ވިދާޅުވިއެވެ.
