އިންޑިއާ ދަތުރެއްގައި ދިވެހި ފުލުހުންގެ އިސް ވަފުދަކުން އެ ގައުމުގެ ފުލުހުންނާއެކު މުހިންމު މަޝްވަރާތަކެއް ކުރިއަށް ގެންގޮސްފިއެވެ. މި މަހުގެ 12 އިން 17 އަށް ކުރެއްވި މި ދަތުރުގައި، ރާއްޖޭގައި ޒަމާނީ ޑިޖިޓަލް ފޮރެންސިކް ލެބޯޓަރީއެއް ތަރައްގީ ކުރުމާ ގުޅޭގޮތުން ޚާއްސަ މަޝްވަރާތަކެއް ކުރެވުނެވެ.
އެސިސްޓެންޓް ކޮމިޝަނަރ އޮފް ޕޮލިސް އަހްމަދު ޝިފާން އިސްކޮށް ހުންނެވި މި ވަފުދުގައި، ސުޕްރިންޓެންޑެންޓް އޮފް ޕޮލިސް ސުލްތާން އަހްމަދު ބިޝާރު، ޗީފް އިންސްޕެކްޓަރ އޮފް ޕޮލިސް އިބްރާހީމް ފާއިޒް އަދި އިންސްޕެކްޓަރ އޮފް ޕޮލިސް މުހައްމަދު އިޝާމް ބައިވެރިވެވަޑައިގެންނެވިއެވެ.
ދަތުރުގެ ތެރޭގައި ވަފުދުން ބައްދަލުކުރެއްވި މުއައްސަސާތަކުގެ ތެރޭގައި ހައިދަރާބާދުގެ ނޭޝަނަލް ޕޮލިސް އެކަޑަމީ، ގުޖުރާތުގެ ނޭޝަނަލް ފޮރެންސިކް ސައިންސް ޔުނިވަރސިޓީ އަދި ރަޝްޓްރިޔާ ރަކްޝާ ޔުނިވަރސިޓީ ހިމެނެއެވެ. މި މުއައްސަސާތަކާއެކު ކުރިން ވެފައިވާ އެއްބަސްވުންތައް ތަންފީޒުކުރުމާ ގުޅޭގޮތުން މަޝްވަރާކުރެވުނެވެ.
މި އެއްބަސްވުންތަކުގެ ދަށުން، ހާއްސަ ތަހުގީގުތަކާއި، ސައިބަރ ފޮރެންސިކްސް، އަދި އިންޓެލިޖެންސްގެ ދާއިރާތަކުން މަތީ ފެންވަރުގެ ތަމްރީނުތައް ލިބިގެންދާނެއެވެ. އަދި ރާއްޖޭގައި ބައިނަލްއަގުވާމީ ފެންވަރުގެ ފޮރެންސިކް ލެބޯޓަރީއެއް ގާއިމުކުރުމަށްވެސް މަގުފަހިވެގެންދާނެ ކަމަށް ދާޚިލީ ވުޒާރާއިން ފާހަގަކުރެއްވިއެވެ. މީގެ އިތުރުން، ނޭޝަނަލް ފޮރެންސިކް ސައިންސް ޔުނިވަރސިޓީން ރާއްޖޭގައި ކެމްޕަހެއް ގާއިމުކުރުމަށްވެސް ހުށަހަޅުއްވާފައިވާ ކަމަށް އެ ވުޒާރާއިން މައުލޫމާތު ދެއްވިއެވެ.
