ޖެނީވާގައި ބޭއްވޭ 48 ވަނަ ޔުނިވަރސަލް ޕީރިއޮޑިކް ރިވިއު (ޔޫ.ޕީ.އާރް) ސެޝަންގައި ދިވެހިރާއްޖެއިން ބައިވެރިވެއްޖެއެވެ. ޕެލޭ ޑި ނޭޝަންސްގައި ދެ ހަފުތާގެ މުއްދަތަށް ކުރިއަށްދާ މި ސެޝަންގައި ދިވެހިރާއްޖޭގެ ވަފުދު ވަނީ ބައިވެރިވެފައެވެ. ވަފުދުގެ އިސް މަންދޫބެއްގެ ގޮތުގައި ހުންނެވީ ޖެނީވާގައި ހުންނަ އ.ދގެ އޮފީހަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދެވެ. މީގެ އިތުރުން ވަފުދުގައި ކައުންސެލަރ އާދަމް ހާމިދު، ކައުންސެލަރ އަލްއުސްތާޛާ އާމިނަތު ޝިފާޔާ އިބްރާހީމް އަދި އެޓާޝޭ މުޙައްމަދު ރާއިދު ސައީދު ބައިވެރިވެވަޑައިގަންނަވައެވެ.
މި ފަހަރުގެ ސެޝަންގައި ދިވެހި ސަރުކާރުގެ މުހިންމު ސިޔާސަތުތަކާ އެއްގޮތްވާގޮތުގެ މަތިން، ރިވިއުކުރެވޭ ޤައުމުތަކަށް ބިނާކުރަނިވި އިސްލާޙުތަކެއް ދިވެހިރާއްޖޭގެ ވަފުދުން ހުށަހަޅާނެއެވެ. މި ސެޝަންގައި ރިވިއުކުރެވޭ ޤައުމުތަކުގެ ތެރޭގައި އެންގޯލާ، ބޮލީވިއާ، ބޮސްނިއާއާއި ހަރޒެގޮވީނާ، މިސްރު، އެލް ސަލްވަޑޮރ، ފީޖީ، ދަ ގެމްބިއާ، އީރާން، އިރާޤް، އިޓަލީ، ކަޒަކްސްތާން، މެޑަގަސްކާ، ސެން މެރީނޯ އަދި ސްލޮވީނިއާ ހިމެނެއެވެ.
ޔޫ.ޕީ.އާރް ވަރކިންގ ގްރޫޕުން އަހަރަކު ތިން ސެޝަން ބާއްވާއިރު، ހަތަރުވަނަ ރިވިއު ސައިކަލް ފެށިފައިވަނީ 2022 ވަނަ އަހަރުގެ ނޮވެންބަރު މަހުގައެވެ. މި ސައިކަލް ނިމޭނީ 2027 ވަނަ އަހަރުއެވެ. ޔޫ.ޕީ.އާރްއަކީ އ.ދ.ގެ މެމްބަރު ޤައުމުތަކުގެ އިންސާނީ ޙައްޤުތަކުގެ ޙާލަތު ވަޒަންކޮށް، އެ ޤައުމުތަކުން އިންސާނީ ޙައްޤުތައް ނަގަހައްޓާ މިންވަރު ބެލުމަށް އެކުލަވާލެވިފައިވާ ނިޒާމެކެވެ.
މި ނިޒާމުގެ ތެރެއިން އިންސާނީ ޙައްޤުތަކުގެ ޙާލަތު ރަނގަޅުކުރުމަށާއި، އިންސާނީ ޙައްޤުތައް ކަށަވަރުކުރުމުގައި މެމްބަރު ޤައުމުތަކުން ހޯދާފައިވާ ކުރިއެރުންތައް އ.ދ.ގެ އިންސާނީ ޙައްޤުތަކާބެހޭ ކައުންސިލަށް ހުށަހެޅުމުގެ ފުރުޞަތު ލިބެއެވެ. އަދި މި ނިޒާމު ޤާއިމުކުރެވިފައިވަނީ އިންސާނީ ޙައްޤުތަކާ ގުޅޭ އިލްތިޒާމުތައް އުފުލުމުގައި މެމްބަރު ޤައުމުތަކުން އިތުރަށް ރަނގަޅުކުރަންޖެހޭ ކަންކަން ފާހަގަކޮށް، އެ ޤައުމުތަކުން ކުރަމުންދާ މަސައްކަތްތައް އަގުވަޒަންކުރެވޭނެ ގޮތަށެވެ.
