ތިނަދޫ ގޮނޑުދޮށަށް ހުއްދަނެތި ގައުކުނޑި އުކާލިކަމަށް ތުހުމަތުކުރެވުނު މައްސަލައިގައި، އެތަކެތި އަޅާފައިވަނީ ތިނަދޫ ސިޓީ ކައުންސިލުން ދެއްކި ސަރަހައްދަށްކަމަށް އެ ކުންފުނިން މިއަދު ބުނެފިއެވެ.
ކުންފުނިން މިއަދު ނެރުނު ބަޔާނުގައި ބުނެފައިވާ ގޮތުގައި، ގައުކުނޑި އަޅާފައިވަނީ ކައުންސިލްގެ މޭޔަރުގެ އިރުޝާދުގެ ދަށުން، ކައުންސިލް އިދާރާގެ ދެ މުވައްޒަފުން ކަމުގައިވާ ހަސަން ރަޝީދު އާއި ކިނާނަތު މުހައްމަދު ދައްކާފައިވާ ސަރަހައްދަށެވެ. އެއީ ތިނަދޫ އުތުރު ފަރާތުން ހިއްކާފައިވާ ބިމުގެ އުތުރު ފަރާތުން ވަރަށް ބޮޑަށް ގިރަމުންދާ ސަރަހައްދެކެވެ.
މިއީ އީޕީއޭ އިންވެސް ގައުކުނޑިފަދަ ތަކެތި އެހެން ރަށްރަށުގައިވެސް އެޅުމަށް ހުއްދަދެއްވާފަދަ ސަރަހައްދެކެވެ.. ކައުންސިލުން ދެއްކިތަނަށް ގައުކުނޑި ކޮންމެ ދުވަހަކު ދުވާލާއި ރޭގަނޑު ކަހަލަ ގޮތަކަށް އަޅަމުންދާތާ 2 މަހަށްވުރެ ގިނަދުވަސްވެފައިވާއިރު "ޤަވާޢިދާޚިލާފަށް އަދި ހުއްދަ ނުހޯދާ" ގައުކުނޑި ވަކިތަނަކަށް އަޅަމުންދާކަން ތިނަދޫ ސިޓީ ކައުންސިލް ފަދަ ރަށުގެކަންކަން ދުވަހުންދުވަހަށް ބަލަހައްޓަމުންދާ އަދި ބެލެހެއްޓޭނެފަދަ ވަޞީލަތްހުރި (ގިނަޢަދަދެއްގެ މުވައްޒަފުންތިބި) ކައުންސިލަކަށް ނޭގި އޮތުމަކީ ޙައިރާންވާންޖެހޭ ކަމެއް ނޫންތޯއެވެ.
ގައުކުނޑި އެޅުމުގެ މައްސަލާގައި ކުންފުނި ބަދުނާމުކޮށް ހަގީގަތާއި ޚިލާފު ވާހަކަ ފަތުރަމުންދާކަމަށް ތުހުމަތުކޮށް، ސްވިފްޓް އިންޖިނިއަރިންގެ އިން ނެރުނު ބަޔާނުގައި ބުނެފައިވެއެވެ.
ސްވިފްޓް ބަޔާނުގައި އިތުރަށް ފާހަގަކޮށްފައިވާ ގޮތުގައި، ގައުކުނޑި އަޅަން ފަށައި ދެ މަސް ވެފައިވާއިރު، ކައުންސިލުން މިހާރު މައްސަލަ ޖައްސަމުންދަނީ ތިނަދޫ ސިޓީ ކައުންސިލްގެ މޭޔަރު އެކުންފުނީގެ މެނޭޖިންގ ޑިރެކްޓަރ އަދި ތިނަދޫ އުތުރު ދާއިރާގެ މެންބަރު ސައުދުﷲ ހިލްމީއާ މެދު ޒާތީވެގެންނެވެ.
ޙަޤީޤަތަކީ ގާކުނޑި އަޅަމުންދަނީ ތިނަދޫ ސިޓީ ކައުންސިލުން ދެއްކި ތަނަކަށްކަމާއި އޭގައި މައްސަލައެއް ނެތްކަން އެނގިތިބެމެ މިހާރު މައްސަލަ ޖައްސަމުންދާ ސަބަބަކީ ތިނަދޫ، ސިޓީއަކަށް ބަދަލުކޮށްފައިވަނީ ވަރަށްބޮޑު އޮޅުވާލުންތަކެއް އޮޅުވާލައިގެން މަކަރާހީލަތުން ތިނަދޫގައި 10000 މީހުން ހަމަނުވަނީސް އެ އަދަދު ހަމަވެފައިވާ ކަމަށް ތިނަދޫ ކައުންސިލްއިން ލިސްޓްހަދައިގެން ދައުލަތުގެ އެކިއެކި މުއައްސަސާތަކަށް ފޮނުވައިގެން ކަމަށް މިކުންފުނީގެ މެނޭޖިންގ ޑިރެކްޓަރ އަދި ތިނަދޫ އުތުރުދާއިރާގެ ރައްޔިތުންގެ މަޖްލިސްގެ މެމްބަރ ސަޢުދުﷲ ޙިލްމީ މިދިޔަ ނޮވެމްބަރ މަހުގެ ފަހުކޮޅުންފެށިގެން ވިދާލުވެ އެ މައްސަލަ އެކިއެކި ފަރާތްތަކަށް ހުށަހަޅާފައިވާތީ އޭނާޔާމެދު ތިނަދޫ ކައުންސިލްގެ މޭޔަރ އާއި ތިނަދޫސިޓީ ކައުންސިލް އިން ޒާތީވެ އައިސްގެންއުޅޭ ރުޅިއެވެ.
ސްވިފްޓް ކުންފުނީގެ ބަޔާނުގައި ބުނެފައި ވެއެވެ.
ކުންފުނިން އިތުރަށް ބުނެފައިވަނީ އެކުންފުންޏަކީ ތިނަދޫއަށް ނިސްބަތްވާ ހަތަރު ހިއްސާދާރުން ހިމެނޭ، ރަށަށް ގެއްލުން ދިނުމަށް ނޭދޭ، އަދި ވީވަރަކުން ރަށަށް ފައިދާހުރި ކަންތައް ކުރުމަށް މަސައްކަތްކުރާ ކުންފުންޏެއް ކަމުގައެވެ. އަދި އެކުންފުނިން ޤާނޫނާއި ގަވާއިދާ ޚިލާފު އެއްވެސް ކަމެއް މީގެކުރިންވެސް ކޮށްފައިނުވާނެ ކަމަށާއި، އަދި އެފަދަ ކަމެއް ކުރިޔަށް އޮތްތަނުގައިވެސް އެކުންފުނިން ނުކުރާނެ ކަމަށްވެސް ސްވިފްޓް އިންޖިނިއަރިންއިން މިމައްސަލާގައި ނެރެފައިވާ ބަޔާނުގައި ބުނެފައި ވެއެވެ.
