މަޖިލީހުން މިއަދު ވަނީ ޒިންމާތައް ބަދަލުކޮށް އަލުން އައްޔަންކުރި ހަތަރު ވަޒީރުންނަށް ރުހުން ދީފައެވެ. މި ބަދަލުތައް ގެނައީ މިދިޔަ މަހު 26 ވަނަ ދުވަހު ހައުސިން މިނިސްޓްރީ އުވާލުމަށްފަހު، އެ މިނިސްޓްރީގެ ދަށުން ހިންގަމުންދިޔަ ހައުސިންއާ ގުޅުންހުރި މަސައްކަތްތައް ކޮންސްޓްރަކްޝަން މިނިސްޓްރީއަށް ބަދަލުކުރުމާ ގުޅިގެންނެވެ.
މި ބަދަލާ ގުޅިގެން، ކުރިން ހައުސިން މިނިސްޓަރުގެ މަގާމުގައި ހުންނެވި ޑރ. އަލީ ހައިދަރު ވަނީ ހަޔަރ އެޑިއުކޭޝަން މިނިސްޓަރަކަށް އައްޔަންކުރެވިފައެވެ. އަދި ހަޔަރ އެޑިއުކޭޝަން މިނިސްޓަރުގެ މަގާމުގައި ހުންނެވި ޑރ. މަރިޔަމް މާރިޔާ ވަނީ އެގްރިކަލްޗަރ އެންޑް އެނިމަލް ވެލްފެއަރ މިނިސްޓަރަކަށް ބަދަލުކުރެވިފައެވެ.
އިތުރު ބަދަލެއްގެ ގޮތުން، ހައުސިން މިނިސްޓްރީގެ ދަށުން ކުރަމުން އައި ޕްލޭނިންގއާ ގުޅުންހުރި މަސައްކަތްތައް ވަނީ ފިނޭންސް މިނިސްޓްރީގެ ދަށަށް ބަދަލުކުރެވިފައެވެ. މިގޮތުން މިނިސްޓްރީ އޮފް ފިނޭންސް އެންޑް ޕްލޭނިންގ މިނިސްޓަރަކަށް މޫސާ ޒަމީރު އަދި މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗަރގެ މިނިސްޓަރަކަށް ޑރ. އަބްދުﷲ މުއްތޮލިބު ވަނީ އައްޔަންކުރެވިފައެވެ.
މި ބަދަލުތަކާ ގުޅިގެން ވަޒީރުންނަށް ރުހުން ހޯދުމަށް މިދިޔަ ބުރާސްފަތި ދުވަހު ދައުރުން ބޭރުގައި ބޭއްވުނު ޖަލްސާއަށް ހުށަހެޅި، މިއަދު ބޭއްވުނު ދައުރުން ބޭރުގެ ދެވަނަ ޖަލްސާގައި މި ހަތަރު ވަޒީރުންނަށް ވަނީ ރުހުން ލިބިފައެވެ. މިގޮތުން ހައިދަރަށް 63 މެންބަރުންގެ ރުހުން ލިބުނުއިރު 6 މެންބަރުން ވަނީ ރުހުން ނުދެއްވާ ވޯޓު ދެއްވާފައެވެ. މާރިޔާ އަދި މުއްތޮލިބަށް 70 މެންބަރުންގެ ރުހުން ލިބުނުއިރު، ޒަމީރަށް 69 މެންބަރުންގެ ރުހުން ލިބިފައިވެއެވެ.
އެގްރިކަލްޗަރ މިނިސްޓަރުގެ މަގާމަށް މާރިޔާ އައްޔަންކުރެވުނީ، ކުރިން އެ މަގާމުގައި ހުންނެވި ޑރ. އާއިޝަތު ރަމީލާ ސިއްހީ ހާލަތު ތަން ނުދިނުމާ ގުޅިގެން އިސްތިއުފާ ދެއްވުމުން، އެ މިނިސްޓްރީ ވަގުތީގޮތުން ހިންގެވުން ވެސް ހަވާލުކުރެވިފައި ވަނިކޮށެވެ.
