ރައްޔިތުންގެ މަޖިލީހުގައި މިއަދު ބޭއްވުނު ދައުރުން ބޭރުގެ ދެވަނަ ޖަލްސާގައި، އެންޓިކޮރަޕްޝަން ކޮމިޝަން (އޭސީސީ) ގެ ހުސްވެފައިވާ މެންބަރުކަމުގެ މަޤާމަށް ރައީސް ޑރ. މުޙައްމަދު މުޢިއްޒު ހުށަހެޅުއްވި ދެ ނަންފުޅު ދިރާސާކުރުމަށް މަޖިލީހުގެ މިނިވަން މުއައްސަސާތަކާބެހޭ ކޮމިޓީއަށް ވަނީ ފޮނުވާއިފިއެވެ.
އޭސީސީގެ ދެ މަޤާމު ހުސްވެފައި މިވަނީ ކޮމިޝަންގެ ނައިބު ރައީސް އަބްދުލްސަލާމާއި މެމްބަރު ޠާހާ މުހައްމަދު މަޤާމުން ވަކިކުރުމުގެ މަސައްކަތް ކުރިއަށްދަނިކޮށް އިސްތިއުފާ ދެއްވުމާ ގުޅިގެންނެވެ. މި މަޤާމުތަކަށް ރައީސް މުޢިއްޒު ހުށަހަޅުއްވާފައިވަނީ މއ. ގޯލްޑަންމޫން، އަހުމަދު ނާޝިދު އަދި ރ. އަލިފުށި، ފަސާނާ، އަބްދުﷲ ނާޝިދުގެ ނަންފުޅެވެ.
ފާހަގަކޮށްލެވޭ ކަމަކީ، ކުރިން މި މަޤާމަށް ހުށަހެޅިފައިވާ ނަންތަކުގެ ތެރޭގައި ރ. ހުޅުދުއްފާރު، ރޯޒް ވިލާ، އާސިޔާ އަޒީމާގެ ނަންފުޅު ހިމެނިފައިވީ ނަމަވެސް، އެ ނަންފުޅުގެ ބަދަލުގައި މިހާރު ވަނީ އަބްދުﷲ ނާޝިދުގެ ނަންފުޅު ހުށަހަޅުއްވާފައެވެ. މަޖިލީހުން ވަނީ މި ބޭފުޅުންނާ ގުޅޭގޮތުން އާންމުންގެ އެއްވެސް ޝަކުވާއެއް އޮތްނަމަ ހުށަހެޅުމުގެ ފުރުސަތު ހުޅުވާލާފައެވެ.
